Дэлхийн улс гүрнүүдийн төр засгийн тэргүүлэгчид В.Путинд дөрөв дэх удаагаа ОХУ-ын Ерөнхийлөгчөөр сонгогдсонд нь баяр хүргэж, мэндчилгээ илгээж эхэллээ. Тодруулбал, Казахстан улсын Ерөнхийлөгч Н.Назарбаев, БНХАУ-ын дарга Ши Жиньпин баярын цахилгаан ирүүлжээ. Мөн Венесуэлийн Ерөнхийлөгч Николас Мадуро, Египетийн Ерөнхийлөгч Абдель Фаттах Аль Сиси, Тажикистаны Ерөнхийлөгч Эмомали Рахмон, Киргизстаны Ерөнхийлөгч Сооронбай Жээнбеков, Армены Ерөнхийлөгч Серж Саргсян, Беларусийн Ерөнхийлөгч А.Лукашенко нар мэндчилгээ илгээсэн байна. Харин АНУ, Их Британи, Герман, Франц тэргүүтэй барууны орны төрийн тэргүүнүүд баяр хүргээгүй аж.

Ингээд ОХУ-ын төрийн тэргүүнээр дөрөв дэх удаагаа сонгогдоод байгаа В.Путиний тухай улс төрөөс ангид 10 сонирхолтой баримтыг танилцуулж байна.

1. Тэрбээр дэлхийн хамгийн баян 10 төрийн тэргүүнийн нэг бөгөөд 60 тэрбум ам.долларын хөрөнгөтэй гэж “Форбс” сэтгүүл тодорхойлжээ.
2. В.Путин “Битлз” хамтлагийн шүтэн бишрэгч. Тус хамтлагийн “Yesterday” дуунд дуртай бөгөөд Пол Маккартнитай хэд хэдэн удаа уулзжээ.
3. В.Путиний өвөө В.Лениний ахлах тогооч байсан бөгөөд И.Сталинд оройн зоог бэлтгэж өгсөн тухай Владимир Владимирович дурссан байдаг.
4. Тэрбээр 2013 онд Кремлийн ордонд “Эсмиральда” бүжгэн жүжгийг үзсэнийхээ дараа гэр бүлээ цуцлуулахаар болсноо албан ёсоор зарласан юм.
5. В.Путин жүдогийн гарын авлагаа 1999 онд хэвлүүлсэн байна.
6. Оросын Ерөнхийлөгч В.Путин 1985, 1986 онд мэндэлсэн хоёр охинтой. Охидынхоо хувийн амьдралыг хэвлэлийнхэн, олон нийтээс ихэд нууцалдаг. Хоёр охин нь өөр овог нэрээр амьдардаг гэх мэдээлэл бий. Мөн Оливер Стоунд өгсөн ярилцлагадаа В.Путин зээ нартай гэдгээ дурджээ.
7. В.Путиний эцэг, эх нэг жилийн дотор хорт хавдраар хорвоог орхижээ.
8. Түүний бага нас Ленинградын нийтийн байранд өнгөрчээ.
9. В.Путин алдартнуудын хөрөг бүхий шуудангийн марк цуглуулдаг юм байна.
10. Түүний тухай 13 баримтат бүтээл туурвисан байдаг аж.

Б.Саруул