Сүүлийн үед бөхчүүд допинг хэрэглэсэн тухай яриа гарч баяр наадмын тухай хуулиар уг бөхчүүдэд шийтгэл ноогдуулж хоёр жил барилдах эрхийг нь хасна гэсэн яриа чих дэлсэх болсон. Допингийн эсрэг үндэсний төв 2017 оны 12-р сард болсон барилдааны үеэр нэр бүхий 31 бөхөөс допингийн шинжилгээ авч, БНСУ дахь итгэмжлэгдсэн лаборторид шинжлүүлсэн бол шинжилгээнд хамрагдсан нийт бөхчүүдийн дөрвөөс нь хориотой төрлийн бодис илэрсэн.
Энэхүү зөрчлийн дагуу Монголын үндэсний бөхийн холбооны тэргүүлэгчид 2018 оны 3 сарын 20 ны өдөр хуралдаж, допингийн эсрэг дүрэм журам зөрчсөн Улсын гарьд Ө.Бат-Орших, Улсын начин Э.Даш, Аймгийн арслан Б.Номиндалай, Сумын заан С.Майнбаяр нарт “Үндэсний бөхийн барилдааны болон барилдааны бусад үед допингийн шинжилгээ хийлгэх, допингийн эсрэг дүрэм зөрчсөн бөхөд хариуцлага тооцох журам”-ын 4.1-д заасны дагуу Улс, аймаг, сумын наадам болон бусад аль ч хэлбэрийн барилдаанд барилдах эрхийг нь хоёр жилээр хасах шийтгэл оногдууллаа. Ингэснээр эдгээр бөхчүүд хоёр жилийн турш зүлэг ногоон дэвжээн дээрээ гарч түмэн олноо баясгах эрхгүй болж байгаа юм.
Эх сурвалж Шуурхай.мн
