Хан-Уул дүүргийн Эрүүгийн анхан шатны шүүхийн ерөнхий шүүгч И.Ганбат тус дүүрэгт энэ оны эхний улиралд шүүн таслагдсан гэмт хэргийн талаар мэдээлэл өглөө.
Тэрбээр, Хан-Уул дүүргийн эрүүгийн анхан шатны шүүх энэ оны эхний улиралд 279 хүнд холбогдох 230 эрүүгийн хэрэг хүлээн авч, 116 эрүүгийн хэргийг шийдвэрлэсэн. Үүнээс 99 хүн ял шийтгүүлсний хоёр нь эмэгтэй, зургаа нь өсвөр насны хүүхэд байна. Шүүн тасалсан нийт гэмт хэргийн дотор мансууруулах эм, сэтгэцэд нөлөөлөх бодис хууль бусаар ашиглахтай холбоотой найман гэмт хэргийг шийдвэрлэсэн бөгөөд энэ төрлийн гэмт хэрэг бусадтай харьцуулахад Хан-Уул дүүрэгт өсөх хандлагатай байгааг ерөнхий шүүгч И.Ганбат онцлов. Түүнээс энэ талаар цөөн асуултад хариулт авлаа.
-Хар тамхи, мансууруулах төрлийн бодистой холбоотой гэмт хэрэг Хан-Уул дүүрэгт өсөх хандлагатай байгаагийн шалтгаан юу вэ?
"Хан-Уул дүүргийн иргэдийн амьжиргааны түвшин бусад дүүрэгтэй харьцуулахад харьцангуй боломжийн түвшинд байдаг. Үүнээс шалтгаалан хар тамхи, мансууруулах бодисыг хэрэглэх гэмт хэргийн гаралт өсөх хандлагатай байна. Айс, мөс, кокайн зэрэг өндөр түвшинд боловсруулсан хар тамхины төрлийн бодис Замын-Үүд, МИАТ гэсэн хоёр сувгаар орж ирдэг. Үүнийг дагаад гэмт хэрэг өсөх хандлага ажиглагдаж байна.
-Хар тамхины төрлийн бодисын хэрэглээнээс сэргийлэх чиглэлээр хэрхэн ажиллаж байна вэ?
-Бид гэмт хэргээс урьдчилан сэргийлэх чиглэлээр нутгийн захиргааны байгууллагууд, тус дүүрэгт үйл ажиллагаа явуулж буй ААН-үүд, ЕБС-иудад гэмт хэргээс урьдчилан сэргийлэх чиглэлээр мэдээлэл, сурталчилгаа хийж байгаа. Гэсэн хэдий ч гэмт хэргийн гаралт буурахгүй байна.
-Хар тамхи, мансууруулах бодистой холбоотой хэрэгт голдуу ямар насныхан холбогдож байна вэ?
-Энэ төрлийн гэмт хэрэгт насанд хүрсэн хүмүүс холбогдож, хэргийг шүүхээр шийдвэрлэсэн. Ахлах ангийн хүүхэдтэй эцэг, эхчүүд хүүхдэдээ маш сайн анхаарал халамж тавих хэрэгтэй. Эцэг, эхчүүдийн хараа хяналт сулрахад өсвөр насныхан гэмт хэрэгт татагдан орох эрсдэл нэмэгддэг гэв.
Erennews.mn