Улстөр / 2017/12/08 / 3

М.Энхболд:Төрийн алба улс төрийн сонгуулийн мөчлөг дагаж өөрчлөгдөхгүй



-Төрийн албаны тухай хуулийн шинэчилсэн найруулгын төсөл батлагдлаа-

  Улсын Их Хурлын чуулганы 2017 оны 12 дугаар сарын 07-ны өдрийн үдээс өмнөх нэгдсэн хуралдаанаар Төрийн албаны тухай хуулийн шинэчилсэн найруулгын төслийн эцсийн хэлэлцүүлгийг хийж, нэгдсэн хуралдаанд оролцсон гишүүдийн 76 хувийн саналаар хуулийн төслийг бүхэлд нь баталсан

Уг хуулийн шинэчилсэн найруулгын төслийг Улсын Их Хурлын гишүүн Д.Тогтохсүрэн нарын 12 гишүүн 2017 оны 02 дугаар сарын 10-ны өдөр Улсын Их Хуралд өргөн мэдүүлсэн юм.

Төрийн албаны тухай хуулийн шинэчилсэн найруулгын төсөл батлагдсантай холбогдуулан Улсын Их Хурлын дарга М.Энхболд чуулганы нэгдсэн хуралдаанд хэлсэн үгэндээ:

“Энэ хууль батлагдсанаар төрийн алба улс төрийн сонгуулийн мөчлөг дагаж өөрчлөгддөг, улс төрөөс хараат байдлаар томилгоо хийгддэг явдал эцэс болно. Төрийн албан тушаалд сонгон шалгаруулж томилох, төрийн албан хаагчийн ажлын гүйцэтгэлийг үнэлэх, шагнаж урамшуулах асуудлыг шийдвэрлэхдээ зөвхөн хувь хүний мэдлэг, боловсрол, мэргэжил, мэргэшил, ур чадвар, туршлага, ажлын үр дүнд тулгуурладаг болно. Тухайлбал, ахлах түшмэлийн ангилалд хамаарах албан тушаалд томилогдох бол төрийн албанд 8-аас доошгүй жил, үүнээс дэс түшмэлийн албан тушаалд 4-өөс доошгүй жил ажилласан байх бөгөөд мэргэшүүлэх багц сургалтад хамрагдаж төгссөн байх шалгуур тавигдаж эхлэх юм. Түүнчлэн Төрийн нарийн бичгийн даргаар томилогдох бол төрийн албанд 16-гаас доошгүй жил, үүнээс эрхэлсэн түшмэлийн албан тушаал буюу яамны газрын дарга, түүнтэй дүйцэхүйц албан тушаалд 8-аас доошгүй жил ажилласан байх гэх зэрэг шалгуур, шаардлагууд тавигдана.

 

Төрийн албаны тогтвортой, мэргэшсэн, хараат бус байх талаарх энэ мэт олон дэвшилтэт зохицуулалт хуульд туссан. Гол нь хуулийн хэрэгжилтийг бүрэн дүүрэн хангаж ажиллах нь чухал. Энэ танхимд хуулийг хэрэгжүүлэх үүрэг бүхий холбогдох албан тушаалтнууд буюу Төрийн албаны зөвлөлийн дарга, орон тооны гишүүд сууж байна. Та бүхэн хууль хэрэгжүүлэх бэлтгэл ажлыг сайн хангаж, хуулийн хэрэгжилтийг сайн зохион байгуулах хэрэгтэй гэдгийг сануулаад хуулийн шинэчилсэн найруулгын төслийг хэлэлцүүлж батлуулахад оролцож ажилласан Байнгын хорооны Ажлын хэсгийн гишүүд, Улсын Их Хурлын нийт гишүүдэд талархал илэрхийлэв.

Төрийн албаны тухай хуулийн шинэчилсэн найруулгын төслийг 2019 оны 01 дүгээр сарын 01-ны өдрөс эхлэн дагаж  мөрдөх юм.



  • Zochin · [202.179.31.77] · 2017/12/09

    Хуучин нэг байгууллагын даргыг солиод өнгөрдөг байсан бол одоо доод энгийн ажилтнуудыг улс төрийн албан хаагчаар сольдог боллоо доо Дараагийн сонгуульд АН ялах учир баярлаад л сууж байна


  • Zochin · [202.179.31.77] · 2017/12/09

    Ёстой жинэхэнэ завруулсан хууль гарлаа Яана даа энэ монгол


  • Иргэн. · [202.55.191.72] · 2017/12/08

    Их аятайхан сонсогдож байна. энэ хуулийн хэрэгжлтэд онцгой хяналт тавьж ажиооах хэрэгтэйшдээ.