Төрийн эрхийг хууль бусаар авахыг оролдсон алдарт 60 тэрбумын хэргийг өнгөрсөн зунаас дахин сэргээн шалгаж байгаа билээ. Прокурорын байгууллагааас уг хэргийн гол баримт болох Г.Доржзодовын тухайн үед хийсэн бичлэг эвлүүлэг биш гэдгийг хүлээн зөвшөөрсөн бөгөөд тагнуулын байгууллагаас сүүлд олж илрүүлсэн зарим шинэ нотлох баримт зэргийг үндэслэн АТГ, ТЕГ-ын хамтарсан ажлын хэсгийн мөрдөгчид хэргийг одоогоор шалгаж дуусаагүй байгаа юм.
М.Энхболд, Ц.Сандуй, А.Ганбаатар нарын оролцсон энэ хэргийг урьд нь шалгах явцад тагнуулын нэг ажилтан нь Г.Доржзодовоос анх хурааж авсан гар утсыг эвдээд буцааж өгсөн болон шүүхийн шинжилгээний үндэсний хүрээлэнгийн шинжээчид нь бичлэгийг эвлүүлэг хэмээн илт худал дүгнэлт гаргах зэргээр Эрүүгийн хэрэг хянан шийдвэрлэх тухай хуулийн заалтуудыг ноцтойгоор зөрчсөн байлаа.
Харин саяхан 60 тэрбумын хэргийн нэг гол эзэн Ц.Сандуй нь хэргээ хүлээсэн байна. Тэрээр намын нөхдөд хандаж хэлэхдээ, “...Одоо үлдэж байгаа 1.5 жилд бид өмнөх 2.5 жилээс илүү ихийг хүсэж байна. Яагаад гэхээр 2020 оны сонгууль хаяанд ирлээ. Сонгуульд оролцоно гэдэг бол хүн алахаас бусдыг хийдэг. МАН-ыг та нар сонгуульд ялуулаарай. Чөтгөртэй нийлээд ч хамаагүй энэ намыг сонгуульд ялуулах ёстой гэсэн ганцхан үүрэг л өгсөн. Өнөөдөр намайг 60 тэрбумын хэрэгтэн гэж байгаа. Тийм ээ, 60 тэрбумын хэрэгтэн Ц.Сандуй би байна” гэжээ.
Түүний энэхүү эрээ цээргүй ярианаас зарим нэг зүйлийг уншигчид анзаарч байгаа байх. Юув гэвэл, Ц.Сандуй мэтийн ийм ёс жудаггүй хүмүүс улс төрийн сонгуулийг “...хүн алахаас бусдыг хийдэг” ажил мэтээр сурталдаж яваа ажээ. Тэд одоо иймэрхүү адал балмад үг яриагаараа олон түмний тархийг угааж эхэлж байна. Нөгөөтэйгүүр, нэр хүнд нь навсайтлаа уначихсан МАН-ыг 2020 оны сонгуульд ямар ч үнээр хамаагүй ялуулахын тулд Ц.Сандуй мэтийн этгээдүүд юу ч хийхээс буцахаа больжээ.
Ц.Сандуйн дээрх ярианд “Чөтгөртэй нийлээд ч хамаагүй МАН-ыг сонгуульд ялуулах ёстой гэсэн ганцхан үүрэг л өгсөн” гэдэг нь бас ихээхэн анхаарал татаж байна. Ийм ноцтой үүргийг бодвол МАН-ын дарга У.Хүрэлсүх нь өгсөн болов уу. Өөр хэн ч байх билээ. Эндээс үзэхэд лав ирэх 2020 оны УИХ-ын сонгууль хуулийн дагуу шударга болно гэж санахын гарз бололтой.
О.Баяр
Шуурхай.мн