Худалдаа Хөгжлийн банкны ТУЗ-ын дарга Д.Эрдэнэбилэг, тус банкны Гүйцэтгэх захирал О.Орхон, “Монголиан коппер корпорейшн” ХХК-ийн гүйцэтгэх захирал Ц.Пүрэвтүвшин нарыг өчигдөр Эрүүгийн цагдаагийн газар албадан авчирч, байцаалт авсан. Мөн байцаалт дууссаны дараа тэднийг дагуулан албан өрөө болон гэрт нь нэгжлэг хийж, шөнийн 00.10 цагт дуусчээ.
Улмаар нэгжлэгийн дараа Эрүүгийн цагдаагийн байрнаас ШШГЕГ-ын харьяа цагдан хорих 461 дүгээр ангид саатуулсан байна. Эх сурвалжийн мэдээлж буйгаар тэднийг яллагдагчаар тооцсон гэнэ.
ЭЦА-наас тэднийг цагдан хорих шаардлагатай гэж үзсэний үндсэн дээр Нийслэлийн Прокурорын газарт хүсэлт хүргүүлсэн юм. Эрүүгийн байцаан шийтгэх тухай хуульд заасны дагуу НПГ-ын хяналтын прокурор уг хүсэлтийг хүлээж аваад, шүүхэд хүргүүлдэг. Гэвч ажлын цаг дууссан учир шүүхээс цагдан хорих захирамж гарах хүртэл тэднийг 461 дүгээр ангид түр саатуулах болсон байна.
Харин маргааш буюу гуравдугаар сарын 6-нд шүүх Д.Эрдэнэбилэг, О.Орхон, Ц.Пүрэвтүвшин нарыг цагдан хорьж шалгах эсэхийг шийдэх аж.