Он гарснаас хойш Ховд аймагт хоёр ч удаа усанд осолдож амь насаа алдсан харамсалтай хэрэг гарлаа. 2018 оны 01 дүгээр сарын 09-ний өдрийн 20:55 цагт Ховд аймгийн Онцгой байдлын газарт аймгийн Мөст сумын Давст багт байрлах “Хагын нуур”-нд Манхан сумын Ботгон багаас Мөст сумын Давст багийн чиглэлд зорчиж явсан “УАЗ-469” загварын дөрвөн зорчигчтой авто машин нуурын усанд живсэн тухай дуудлага ирсэн байна. Дуудлагын дагуу эрэн хайх ажиллагааг зохион байгуулж 01 дүгээр сарын 10-ны өдрийн 11:40-11:46 цагийн хооронд ослын газраас 80 метр зайтай, гурван метрийн гүнээс 60 настай иргэн А гэгч, 36 настай Б нарын цогцсыг олж цагдаагийн газарт хүлээлгэн өгсөн харамсалтай хэрэг гарсан. Харын энэ хэрэг намжаагүй байтал тус аймгий Булган сумын Баянгол багийн нутагт байрлах “Хагшаал” гэх газарт долоон настай хүү осолдсон харамсалтай хэрэг дахин гаржээ. Сумын төвөөс хойд зүгт 17 км-т долоон настай иргэн Б нь 01 дүгээр сарын 14-ний өдрийн 13 цагт гэрээсээ гараад сураггүй болсон байна. Энэ тухай мэдээллийг Баянгол багийн Засаг дарга Б.Гансүх нь Булган сум дахь Онцгой Байдлын Хэлтэст орой 19 цаг 15 минутад дуудлага өгч мэдэгдсэн байна. Дуудлагын дагуу ОБХ-ийн Гал түймэр унтраах аврах 38 дугаар ангийн салааны захирагч Ахлах дэслэгч Б.Батсүхээр ахлуулсан 8 албан хаагч, , сумын ЗДТГазрын дарга Ш.Ганболдоор ахлуулсан 10 албан хаагч, Цагдаагийн тасгаас д/ч Г.Сайханбилэгээр ахлуулсан 5 албан хаагч, нийт 23 албан хаагч, 3 техник хэрэгсэлтэйгээр 19 цаг хөдөлж ,эрлийн ажиллагааг эхлүүлсэн байна . Мөн Баруун бүсийн төв Онцгой байдлын газрын ЭХАА-ийн захирагч а/х С.Даваажаргалаар ахлуулсан зургаан албан хаагч нэг автомашинтайгаар шөнийн 01 цагт аймгийн төвөөс Булган сум руу хөдөлж эрлийн ажиллагаанд оролцлоо.Мөн сумын ард иргэд ч энэхүү эрэнхайх ажиллагаанд оролцож байгаа. Одоогоор 128 хүн, 11 техник хэрэгсэлтэйгээр 37 цооног гаргаж усчин аврагчид усанд шумбаж эрлийг үргэлжлүүлсээр байгаа бөгөөд усанд осолдсон Б-г хараахан олоогүй байна. Цаг агаар харьцангуй тогтуун байгаа ч усны гүн мөснөөс доошоо 1 метр 40 см байна гэж аймгийн Онцгой байдлын газраас мэдээллээ. Иймээс бага насны хүүхдэд анхаарал халамжаа нэмэгдүүлэхийг ОБЕГ-аас санууллаа. Мөн ард иргэд ч сонор сэрэмжтэй байхыг анхааруулья.
Эх сурвалж: Л. Дима Шуурхай.мн