Төр, нийгмийн зүтгэлтэн С.Зориг агсны амийг хөнөөсөн хэргээр ял авсан Т.Чимгээ Б.Содномдаржаа нарыг эрүүдэн шүүсэн хэргээр Тагнуулын ерөнхий газрын дарга асан Б.Хурц, УЕП-ын орлогчоор ажиллаж байсан Г.Эрдэнэбат нарын есөн хүнийг шүүх хурал Төв аймгийн шүүхэд болж байна. 

Энэ үеэр Т.Чимгээгийн нөхөр С.Бямбасүрэнгээс зарим зүйлийг тодрууллаа.

-Таны эхнэрийг эрүүдэн шүүсэн гэх хүмүүст холбогдох шүүх хурал болж байна. Шүүх энэ хэргийг хэрхэн шийднэ гэсэн хүлээлт байна вэ? 

-Таван жил хүлээлээ. Үнэн ялдаг бол ялах байлгүй дээ. Б.Хурц нарын эрүүдэн шүүсэн гэх асуудал бичлэгээр нотлогдоод байхад шүүх хурлыг удаа дараа хойшлуулаад хэргээ хүлээхгүй байна. Арай дэндэж байна. Таван жил хорих ангид хоёр хүн тарчлан зовж, ар гэрийнхэн нь гадаа давхар яллуулж байна. Үүнийг Монголын ард түмэн мэдэж байгаа. Үнэн ялах байх. 

-Хамгийн сүүлд эхнэртэйгээ хэзээ уулзсан бэ? 

-Хоёрдугаар сарын 1-нд уулзсан. Биеийн байдал маш дорой байгаа. Хорих ангийн эмнэлэгт байгаа ч бие нь тааруу байна. Сэтгэл санаагаар үхэж байна. 

-Эхнэр чинь шүүхэд итгэх итгэл хэр байна? 

-Өөрөө хийгээгүй хэрэг учраас шоронгоос гарна гэдэгтээ бат итгэдэг. Ар гэр нь давхар хэлмэгдэж болдогийг биеэрээ үзэж байна. Ахиж нэг ч иргэн ийм зовлон бүү амсаасай. Шүүх хурал болох болгонд эхнэр маань суллагдах байх гэж баярлаж ирдэг.

Б.Аз