ЗГХЭГ-ын дарга Л.Оюун-Эрдэнээс цаг үеийн асуудлаар тодруулга авлаа.
-"Эрдэнэт үйлдвэр"-ийн ажлын хэсгийг та ахалсан. Ямар үр дүн гарав?
-"Эрдэнэт үйлдвэр"-ийн 49 хувь Сингапур улс руу шилжих гэж байсантай холбогдуулан ажлын хэсэг гарч, би ахалсан. Ингээд онцгой дэглэм тогтоосон. УИХ-ын тогтоолын дагуу "Эрдэнэт үйлдвэр" төрийн өмчит компани болчихсон. Улмаар онцгой дэглэмийн хугацаа дууссан. Уг хэрэгт холбоотой Д.Эрдэнэбат, Б.Болор гэх мэт хүмүүс ял аваад явсан. Тиймээс ажлын хэсэг үр дүнгээ гаргасан гэж үзэж байгаа. Одоо 400 гаруй сая долларын асуудал яригдаж байгаа. Миний хувьд төрийн мөнгө гэж үзэж байгаа.
-Таныг тагнасан, чагнасан асуудал юу болж байна вэ?
-Шалгагдаад явж байгаа гэж би ойлгож байгаа. Надад ч гэсэн шалгаад явж байгаа гэх мэдээллийг л албаны хүмүүс өгөөд байна. Би шүүхийн шийдвэр гарахаас өмнө элдэв юм яриад юу гэхэв.
-Хэнтий аймагт баригдсан "Андлалын өргөө"-ний асуудал юу болсон бэ?
-Баригдаж дуусаагүй. Тэр асуудалд яагаад надруу дайрсаныг би ойлгоогүй. Дуустал нь зүгээр байлгаач ээ гэж хэлмээр байна. Хариуцсан яам нь ажиллаж байгаа шүү дээ.