Улс төрийн нэрт зүтгэлтэн С.Зоригийг хөнөөсөн хэрэгт гурван шатны шүүхээс ял сонссон Б.Содномдаржаа нарыг шалгах явцдаа эрүүдэн шүүсэн хэргээр тухайн үед хууль хяналтын байгууллагыг удирдаж байсан эрхмүүд шүүхийн өмнө суугаад байгаа. ТЕГ-ын дарга асан генерал Б.Хурц, Улсын ерөнхий прокурорын орлогч Г.Эрдэнэбат нарын 9 хүн өнгөрсөн долдугаар сард анхан шатны шүүхээс гурав хүртэл жилийн ял сонссон. Шүүгдэгчдийн гомдлоор давж заалдах шатны шүүх өнгөрсөн долоо хоногт болж хэргийг дахин анхан шатны шүүхээр хэлэлцүүлэхээр буцаалаа.
22 жилийн хугацаанд илрээгүй улс төрийн захиалгат гэмт хэргийг илрүүлсэн хууль хяналтын байгууллагын удирдлагууд өөрсдөө шүүгдэж байгаа нь олон нийтийн анхаарлын төвд буй. Энэ талаар нэр нөлөө бүхий хүмүүс ч байр сууриа илэрхийлсээр ирсэн.
УИХ-ын гишүүн, Хууль зүйн сайд асан Х.Тэмүүжин шүүгдэгчдийн нэг орлогч прокурор асан Г.Эрдэнэбатын тухай "Багш, эрдэмтэн, прокурор Г.Эрдэнэбат өөрийн итгэл үнэмшлийн эсрэг үйлдэл хийх хүн биш. Эрүү шүүлт тулгах гэмт хэргийг зөвхөн хэрэг бүртгэгч, мөрдөн байцаагч нар үйлддэг мэт хуульчилсан 2002 оны Эрүүгийн хууль энэ гэмт хэргийг өөр бусад этгээд үйлдэж, өөгшүүлэхийг дэмжээд байна. Тиймээс төрийн бүх албан тушаалтанд хамаатай болгож хүнд эрүү шүүлт тулган зодож тарчлаасан этгээд төдийгүй, түүнийг хараад таслан зогсоолгүй мэдсээр байж дуугүй өнгрөөснөөрөө дэмжин өөгшүүлж буй бүх эрх мэдэлтэй этгээд энэ гэмт хэргийн субьект болдог байж энэ ёс бус үйлдэл Монголд зогсоно. Энэ үгийг хэлж, 2002 оны бусармаг хуулийг өөрчлөхийн төлөө 2015 оны Эрүүгийн хууль дээр бидэнтэй цуг ажилласан залуу бол тэр үед Улсын Ерөнхий прокурорын орлогч байсан Г.Эрдэнэбат.
Г.Эрдэнэбат Эрүүгийн эрх зүйг хүмүүнлэг болгох тухай судалж, сэтгэл гарган ажилладаг эрдэмтэн! Тэр өөрийн итгэл үнэмшлийн эсрэг үйлдэл хийх хүн биш. Шинжлэх ухааны талбарт ч, хуулийн салбарт ч олон жил хамтарч ажилласан анд найз минь өөрийнхөө хамгийн жигшин зэвүүцдэг үйлдэлд хомроглогдон буруутгагдаж, ял авч буйд үнэхээр харамсам. Үнэн худал ялгарч, хууль шүүх захиалгагүй шударга ажиллах цаг ирнэ. Зөв цагийг ойртуулахын тулд зөв хүмүүс нь илүү чармайн ажиллах хэрэгтэй болж...Монголын шүүх улс төрийн даалгавар, цахим сэтгэгдэл, эрх мэдэлтний хувийн дүгнэлт, олны хэл ам, хэвлэлийн яллагаагаар шийдвэр гаргадаг болоод удлаа! Хамгийн адгийн нь: Би үхэхээр чи үх гэгчээр ажилтайгаа үлдэх гэж гэмгүй нэгнийг гэмтэн болгож таслах шүүгч, дээрээс чиглэлтэй бол хуульгүйгээр нүдээ аниад муйхарлан яллах прокурорууд хожим өөрийг нь ч, үр хүүхдүүдийг нь ч ийм байдлаар шийтгэж, яллаж болох хөгийн нийгэм бүтээлцэж буйгаа ойлгож байгаа болов уу?!" хэмээжээ.
Б.ЗАЯА
Эх сурвалж: shuurhai.mn