Сүхбаатар дүүрэгт өчигдөр 1 тохиолдол батлагдсан. Тус батлагдсан тохиолдлын ойрын хавьтал олдохгүй, товчоодыг хаах зэрэг арга хэмжээ авсан. Улмаар орой 23.00 цагийн алдад товчоодын үйл ажиллагааг эргэн хэвэнд нь оруулсан юм.
ХӨСҮТ-ийн Тандалт судалгааны албаны дарга А.Амбасэлмаа "Өчигдөр, уржигдар халдварын хавьтал болсон хүмүүс олдохгүй байх, утсаа авахгүй, хаана байгаа байршлаа хэлэхгүй байх, халдвар авснаа мэдэхгүй зочид буудал бусад газруудаар явах тохиолдол гарч байна.
Халдвар авчихаад, халдвар авсан хүнтэй хавьтал болчихоод түүнийгээ хэлэхгүй, санаатай, санамсаргүйгээр явах тохиолдол их байгаа учир ард иргэд аль аль талдаа онцгой анхаарах шаардлагатай байна.
Хүнс худалдааны төвүүд нээгдэж байна. Ард иргэд чөлөөтэй явж байна. Хэдийгээр ойрын хавьтлуудаас халдвар илэрч байгаа ч хүрээ тэлэгдсээр байгааг иргэд анхаарах хэрэгтэй байна. Халдварын тархалт их байгаа энэ үед халдварт өртөх эрсдэл маш өндөр болж байна. Тиймээс ард иргэд өөрөө өөрсдийгөө хамгаалах, ойр дотныхоо хүмүүсийг хамгаалахын тулд гадуур дотуур явахгүй, амны хаалтаа сайн зүүж, зай барих, олон хүн цугларсан газарт очихгүй байхад онцгой анхаарах шаардлагатай байна" гэлээ.