-Монгол Улсын Ерөнхийлөгч шүүхийн байгууллагад анхаарлаа хандуулах цаг нь болжээ-
АТГ-аас эрх мэдэл, албан тушаалаа урвуулан ашиглаж улсаас их хэмжээний мөнгө хулгайлж, хумсалсан байж болзошгүй гэх нөлөө бүхий эрхмүүд болох төрийн өндөр албан тушаалтнуудыг шалгаж, цагдан хорьж сүр дуулиантай мэдээллийг олон нийтэд хүргэдэг ч эцэст нь олныг тохуурхсан инээдтэй гэмээр шийдвэрийг шүүхийн байгууллага гаргаж үүнийгээ хээв нэг танилцуулдаг болчихлоо.
Тухайлбал, өчигдөр Барилга хот байгуулалтын сайд асан З.Баянсэлэнгэ нарт холбогдох шүүх хурал Баянгол, Хан-Уул, Сонгинохайрхан дүүргийн эрүүгийн хэргийн анхан шатны шүүхэд болсон. Ямартай ч шүүхээс түүнийг тус яамны сайдаар ажиллаж байхдаа буюу 2016 онд Бэрэн группийн барьсан орон сууцнаас 123 орон сууцыг тендэр зарлалгүйгээр худалдан авсан нь улсын төсөвт 972,448,955 төгрөгийн хохирол, хүнд хор уршиг учруулсан гэмт хэрэг хэмээн үзэж түүнийг төрийн байгууллагад ажиллах эрхийг 3 жилийн хугацаагаар хасч, хөдөлмөрийн хөлсний доод хэмжээг 100 дахин нэмэгдүүлсэнтэй тэнцэх хэмжээний буюу 19,200,000 төгрөгөөр торгох ялаар шийтгэлээ.
Тэгэхээр З.Баянсэлэнгэд ногдуулсан энэхүү шийдвэр хэр үнэнд нийцэх вэ гэдэг асуулт гарч ирж байна. Уг нь түүнийг цагдаа, прокуроынхон албан тушаалаа урвуулан ашиглаж улсад их хэмжээний хохирол учруулсан гэдгийг нь тогтоож яллах дүгнэлт үйлдэн шүүх рүү хүргүүлсэн ч шүүгчид З.Баянсэлэнгийн толгойг илж төсвийн мөнгийг хулгайлж болдог гэдгийг ард түмэнд харуулчихлаа. Уг нь сайд асан хатагтайг хамтрагчийнхаа хамтаар албаны эрх мэдэл буюу албан тушаалын байдлаа урвуулан ашигласны улмаас улсын төсөвт хүнд хор уршиг учруулсан гэмт хэрэг үйлдсэн гэмт буруутайд тооцсон хэрнээ яагаад түүнийг 19 сая төгрөгөөр торгох ял ногдуулав гэдгийг шийдвэр гаргасан шүүгчдээс асуумаар байна.
Хэрвээ уншигчид санаж буй бол өнгөрсөн оны зургаадугаар сард авлига, албан тушаалын гэмт хэрэгтэй тэмцэхэд төр бодлогоо чангатгалаа хэмээн МАН-ынхан орилж байсан. Гэтэл бодит амьдрал дээр чангатгах нь бүү хэл албан тушаалтнуудыг торгоод өнгөрдөг жишгийг тогтоочихлоо. Угтаа бол шүүх, хууль хяналтын байгууллагууд зөвхөн улс төрчид болон, эрх мэдэл, эд хөрөнгөтэй хүмүүсийн нөлөөнд автаж хууль бус, шударга бус шийдвэрүүдийг гаргаж байгааг З.Баянсэлэнгийн шүүхийн шийдвэр бэлээхэн нотолчихлоо. Шүүгчдээс ингэж асуумаар байна. Жирийн иргэдэд хатуу, мөнгөтэй эрх мэдэлтэй хүнд зөөлөн үйлчилдэг шүүх гэж байх ёсгүй биз дээ.
Уг нь хийсэн хэргийнх нь төлөө хатуухан шийтгэж зохих ял шийтгэлийг нь өгдөг бол манай сайд, дарга нар улсын өмч хөрөнгөнөөс улайм цайм хумсалж хулгайлж чадахгүй нь ойлгомжтой. Ямартай ч эцэст нь Монголын хууль, шүүх З.Баянсэлэнгэд өгөөмөр загнаж хуулийг гууль болгочихлоо. Энэ мэт шийдвэрээс үүдэж авлигачид цөөрөх нь бүү хэл улам олуулаа болж, улс орны эдийн засгийг бүхэлд нь хорлож буй энэ цаг үед Монгол Улсын Ерөнхийлөгч шүүхийн байгууллагад анхаарлаа хандуулах цаг нь болжээ.
Erennews.mn