-Шадар сайд гамшгийн улмаас орон гэргүй болсон иргэдийн судалгааг нарийвчлан гаргахыг үүрэгдлээ-
Өчигдөр эхэлсэн цасан шуурганы улмаас цахилгаан дамжуулалтын тулгуур баганууд унаж, баруун аймгуудын 52 сум цахилгаангүй болсон. Дээрх нөхцөл байдалтай холбогдуулан өнөөдөр Улсын онцгой комисс Шадар сайдын өрөөнд хуралдлаа.
Шадар сайд Ө.Энхтүвшин өнөөдөр болсон Улсын онцгой комиссын хуралдаанаар дараах шийдвэрүүдийг гаргалаа. Тэрээр "Нэгдүгээрт Эрчим хүчний сайд, Улсын онцгой комиссын гишүүн Ц.Даваасүрэнд хүчтэй цасан болон шороон шуурганы улмаас Баян-Өлгий, Ховд, Увс аймгийн бүх сум, Говь-Алтай аймгийн таван сум хүчдэлгүй болж, цахилгаан дамжуулах агаарын 13 тулгуур багана унасан тул дээрх аймгийн хэрэглэгчдийг эрчим хүчээр бүрэн хангах ажлыг шуурхай зохион байгуулж, үр дүнг Улсын онцгой комисст мэдэгдэнэ. Маргааш гэхэд цахилгаан эрчим хүчийг бүрэн хэмжээгээр хэвийн байдалд оруулна гэж би сайдын ярианаас ойлголоо.
Хоёрдугаарт цахилгаан дамжуулах тулгуур баганыг сэргээн засварлах үйл ажиллагаан зарцуулсан зардал нийт дүнгээрээ 391 сая төгрөгийг лхагва гарагт болох Засгийн газрын хуралдаан дээр оруулж шийдүүлье.
Баян-Өлгий аймгийн Засаг дарга А.Гылымхан, Говь-Алтай аймгийн Засаг дарга С.Гансэлэм, Ховд аймгийн Засаг дарга Б.Дүгэржав, Увс аймгийн Засаг дарга Д.Батсайхан нарт баруун бүсийн эрчим хүчний системд гэмтэл гарсантай холбогдуулж аймаг, сумдын эмнэлэг, шуурхай албадыг бэлэн байдалд ажиллуулж, цахилгааны нөөц эх үүсвэрийг хэвийн ажиллуулахад анхаарч ажиллах.
Шуурганы улмаас орон гэргүй болсон иргэдэд төрийн үйлчилгээ шуурхай хүрэх ажлыг зохион байгуулах. Одоогоор 216 айлын гэр унасан гэдэг мэдээ ирсэн. Говь-Алтай аймагт 107 гэр, Ховд аймагт 29 гэр, Увс аймагт 75 гэр, Баян-Өлгий аймагт 5 гэр гэсэн мэдээлэл байна. Зайлшгүй улсын нөөцөөс гэр хүргэх айл өрхийн тодорхой судалгааг гарган энэ долоо хоногт багтан оруулж ирье.
ОБЕГ-ын дарга, хошууч генерал Т.Бадралд гамшгийн улмаас орон гэргүй болсон иргэдийн судалгааг нарийвчлан гаргаж, шаардлагатай бол улсын нөөцөөс бараа, материал гарган тэдгээрийг буцаан нөхөн бүрдүүлэх ажлыг Засгийн газрын лхагва гарагийн хуралдаанд оруулж шийдүүлье.
Цаг уур, орчны шинжилгээний газрын дарга, Улсын онцгой комиссын гишүүн С.Энхтүвшинд цаг агаарын аюулт үзэгдлээс урьдчилан сэргийлэх сэрэмжлүүлэг мэдээллийг олон нийтэд шуурхай хүргэх, шаардлагатай тохиолдолд онцгой байдлын асуудал эрхэлсэн төрийн захиргааны байгууллагатай хэвлэлийн бага хурал зохион байгуулж ажиллаж байхыг үүрэг болгож байна" хэмээн танилцууллаа.