Ерөнхий сайдын ЖДҮ-чин андууд ичиг, ичиг


ЖДҮХС-аас зээл авсан УИХ-ын гишүүдээс болж төрийн ажил бүтэн нэг сар гацаанд орж ард түмний амьдрал доройтсоор л байна. Тэгвэл төрийн ажлыг гацаагсад хэн бэ. Тэд яагаад ингэж аашлах болов. Шалтгаан нь юунд байгаа тухайг товчхон өгүүлье.

Тухайлбал, Улсын Ерөнхий прокуророос УИХ-ын дөрвөн гишүүний бүрэн эрхийг түдгэлзүүлэх саналыг УИХ-д өргөн мэдүүлчихээд байгаа. Тодруулбал, Прокуророос УИХ-ын гишүүн Л.Энхболд, Б.Ундармаа, Г.Солтан, Д.Дамба-Очир нарын УИХ-ын бүрэн эрхээс нь түдгэлзүүлэх саналыг гаргажээ. Тэднийг ЖДҮХС-гаас хамаарал бүхий этгээдээрээ дамжуулж зээл авахдаа албан тушаал, эрх мэдлээ ашигласан байж болзошгүй гэж үзэж байгаа бололтой. Ерөнхий прокурорын саналыг 48 цагийн дотор хэлэлцэж, шийдвэр гаргах хуультай юм.

Тус саналыг хэлэлцэхийн тулд заавал УИХ хуралдах ёстой. Гэтэл дээрх сангаас зээл авсан УИХ-ын гишүүд санаатайгаар төрийн ажлыг гацааж бойкот зарлаж байгаагаа харуулсан. Тиймээс л өнөөг хүртэл чуулганы ирц бүрдэлгүй байсаар ЖДҮ-чин гишүүдийн асуудлыг хэлэлцэж чадалгүй өнөөдрийг хүрсэн хэрэг. Түүнчлэн одоогоор мэдэгдсэн нь доорх нэр бүхий дөрвөн гишүүн ч гэлээ цааш нь маш олон гишүүдийн нэрс хөвөрнө гэдгийг эх сурвалж мэдээлж байв. Ингээд ямар, ямар гишүүдийн асуудал чуулганаар орохоор хүлээж буйг сонирхоё.

1.УИХ-ын гишүүн Б.Ундармаа өөрийн 100 хувийн эзэмшлийн "Доктор МЭИК" ХХК-д ЖДҮХС-аас 700 сая төгрөгийн зээл,

2.УИХ-ын гишүүн Г.Солтан мөн өөрийн үүсгэн байгуулсан “Монгол шаазан” ХХК-д ЖДҮХС-аас 950 сая төгрөгийн зээл,

3.УИХ-ын гишүүн Д.Дамба-Очир “Сапфир стоун” ХХК-д ЖДҮХС-аас 1.2 тэрбум төгрөгийн зээл авахад нь дам байдлаар нөлөөлсөн,

4. УИХ-ын гишүүн Л.Энхболд төрсөн охин Э.Мандухайн нэр дээр байгуулсан “Мийт экспорт интернэйшнэл” ХХК-д ЖДҮХС-аас 1,3 тэрбумын зээл тус тус авсан юм.

Ерөнхий прокурор М.Энх-Амгалан өмнө нь УИХ-ын гишүүн Б.Батзоригийн бүрэн эрхийг түдгэлзүүлэх асуудлыг оруулж ирсэн. Түүнийг мөн л эрх мэдлээ ашиглан хувийн компанидаа зээл авсан асуудлаар яллагдагчаар татаж, бүрэн эрхийг нь түдгэлзүүлэхийг хүссэн. Гэвч УИХ түүнийг авч үлдсэн. Улаан цайм хууль зөрчсөн, эрх мэдлээ хэтрүүлсэн хүнийг УИХ хаацайлсан.

Аргаа барсандаа Ерөнхий прокурор М.Энх-Амгалан "Би гурав дахь удаагаа асуудал оруулж ирж байна. Эхний хоёр дээр нь та нар татгалзсан хариу өгсөн. Шударга ёс гэдэг чинь энэ танхимаас эхлэх ёстой юм. Хаана байгаа юм тэр шударга ёс чинь. Хууль ёсыг дээдлэх ёстой гэсэн зарчимтай Их хурал чинь яагаад энэ хүмүүсийг журмынх нь дагуу шалгуулж болдоггүй юм" хэмээн бухимдаад авсан.

Тэгвэл хууль зөрчсөн, эрх мэдлээ ашигласан шалтгаанаар дөрвөн гишүүний бүрэн эрхийг түдгэлзүүлэх саналыг оруулж ирлээ. УИХ яах вэ!? Хэлэлцсэн нэр зүүж, шударга ёсыг дахиад парламентын танхимд уландаа гишгэх үү. Эсвэл хуулийн байгууллагын саналыг хүлээн авч, шударга ёсыг харуулах уу. Аль эсвэл Ерөнхий сайд ЖДҮ-чин андуудаа хамгаалж төрийг гацаасаар байх уу.

40-ийн 40-үүлээ М.Энхболдоос шударга ёс нэхсэн ЖДҮ-чид хүнээс шударга ёс нэхэх эрх байгаа эсэхийг цаг хугацаа л харуулах үлдлээ. Ард түмэнд очих ёстой хөрөнгө оруулалтыг эрх мэдлээ далайлган замаас нь хулгай хийсэн ЖДҮ-чидэд шударга ёсыг харуулж чадах эсэхийг харцгаая...


Энэ мэдээ таалагдаж байвал:


  • Зочин · [150.129.142.87] · 2019/01/11

    Ene ch jinhene hongil bishuu Yaagaad jijig dundiig hamgaalaad bna aa deer dorgui hohirson irged ch tag chig


  • Зочин · [66.181.177.215] · 2019/01/10

    ИХ гишуудийг бугдийг нь яагаад хариуцлага тооцоогуй юм бол Терийг гацааж буй Энхболд гишуун ч ес зуйн хариуцлага хулээж огцор


  • Иргэн · [139.5.217.144] · 2019/01/10

    Энэ хэргийг"ЖДҮ"-г зохион байгуулсан ЗГ хариуцлагаа хүоээх ёстой?!


  • Зочин · [202.179.25.47] · 2019/01/10

    TEMUULEN GISHUUN EEJDEE ZEEL AVSAN OYUNDARI HUUDEE ZEEL AVSANIIG YAGAAD NUUGAAD BAINAAA UZEMJEEREE AJIL HIIDEG HUULIIN BAIGUULLAGA BAIH YOSGUI SHUU