Дорноговь аймгийн Замын-Үүд сум дахь Гаалийн газрын улсын ахлах байцаагчийг өнгөрсөн амралтын өдрүүдэд АТГ-ынхан үйлдэл дээр нь баривчилан цагдан хорьсон байна. Тодруулбал, Замын-Үүдийн гаалийн байцаагч нар өмнө нь байнга бусдаас хахууль авсан хэрэгт холбогдон шалгуулж, АТГ-аас удаа дараа ийм хэрэг зөрчлөөс урьдчилан сэргийлэх зөвлөмжийг харьяа яам болон тус газарт хүргүүлсэн ч үр дүнд хүрээгүй бололтой.

Гаалийн байцаагчдын авлига авах арга нь улам нарийсч, Эрээнд хотод очиж мөнгөө өгч авалцдаг, бэлнээр нь өгдөг байсан гэх мэдээлэл байна. Эх сурвалжийн хэлж буйгаар О гэх нь хүнийг удаа дараагийн үйлдлээр, хясан боогдуулж, хахууль авсан үндэслэлээр АТГ-ынхан өнгөрсөн ням гарагт баривчилж, цагдан хорьжээ. Одоогоор хэргийг үргэлжлүүлэн шалгаж байна.