Хүнс, хөдөө аж ахуй хөнгөн үйлдвэрийн яамнаас зохион байгуулж буй гулууз махны өргөтгөсөн худалдаа өнөөдрөөс эхлэн нийслэлийн зургаан цэг дэх худалдааны төв, томоохон нэгж талбайд зохион байгуулах гэж байна. Тодруулбал,
1.Баянгол дүүрэг, Хишиг төвийн байранд Ховд, Завхан, Өвөрхангай аймгууд
2.Баянзүрх дүүрэг, Жуковын хөшөөний өмнөх талбайд Дорнод, Сүхбаатар, Баян-Өлгий аймгууд
3. Сонгино-Хайрхан дүүрэг, Хархорин захын замын эсрэг талд Говь-Алтай, Булган, Төв, Увс аймгууд
4. Сүхбаатар дүүрэг, Саруул төвд Дорноговь, Архангай, Дархан-Уул, Орхон аймгууд
5. Чингэлтэй дүүрэг, Амин хүнс худалдааны төвд Сэлэнгэ, Төв, Дундговь, Хэнтий аймгууд
6. Хан-Уул дүүрэг, Лавай худалдааны төвд Баянхонгор, Хөвсгөл, Өмнөговь аймгуудаас нийлүүлсэн махны худалдаа болох аж. Хамгийн сайшаалтай нь энэ өдрүүдэд нийслэлийн иргэд хамгийн хямд үнээр хэрэгцээний махаа авах боломжтой болж байна. Учир нь дээрх төвүүдэд ченжүүдийн гар дамжиж дамлагдаагүй, орон нутгаас малчдын хотон дахь үнээрээ худалдаалагдах гэнэ. Махны үнийн өсөлт болоод олдоц муу байгаа гэх таагүй нөхцөл байдлын эсрэг сөрсөн энэ таатай арга хэмжээний албан ёсны нээлтийн үйл ажиллагаа өнөөдөр 11:00 цагт Чингэлтэй дүүргийн Амин хүнс худалдааны төвд боллоо. Энэ удаагийн худалдаа гулууз махаар давамгайлах бол тун удахгүй өвлийн идэшээ базаах боломжийг олгосон "Идэш" арга хэмжээгээр үргэлжлэнэ гэх мэдээллийг салбарын яамнаас өгч байна. "Гулууз" махны өргөтгөсөн худалдаа ирэх сарын 3-ныг хүртэлх хугацаанд буюу гуравхан хоногт зохион байгуулагдах аж.