Эрүүл мэндийн сайд Д.Сарангэрэл Улсын онцгой комисст коронавирусын нөхцөл байдлын талаар танилцууллаа. Тэрээр “ДЭМБ, БНХАУ-ын албан ёсны мэдээллийг үндэслэн ард иргэдэд мэдээлэл өгч байгаа. БНХАУ-ын 31 мужид коронавирусын тохиолдол, Эрээн хотод 39 тохиолдол илэрсэн. Мөн Өмнөговь аймагтай хиллэдэг бүст халдварын тохиолдол нэмэгдэж, эрсдэл улам өндөр болж байна. Эрүүл мэндийн салбар халдвараас урьдчилан сэргийлэх чиглэлээр ажиллаж байгаа. ДЭМБ-аас өгч байгаа мэдээллээр зөвхөн Хятад иргэд биш бусад орны иргэд ч өвчилсөн. 2-14 хоногийн нууц байдалтай халдвар явж, халдварын шинж тэмдэг илрээгүй хэрнээ бусдад халдвар тарааж байгаа тохиолдол илэрсэн. Эрсдэл өндөр байгаа учраас халдвар гарсан үед бэлэн байдалтай байх чиглэлээр ажиллаж байна. Япон улсад үйлдвэрлэгдсэн 200 оношлуурыг авсан, маргааш 500 ширхэг оношлуур Монгол Улсад ирж байна. Мөн эрүүл мэндийн сайдын зүгээс Сар шинийн баярыг коронавирусийн халдварын үед тэмдэглэхгүй байх санаачлага гаргахад 80 гаруй хувь нь дэмжиж байна лээ. БНХАУ-д ч коронавирусийн тархалт Цагаан сарын баяраар нэмэгдсэн нь тогтоогдсон. Тиймээс бид ч гэсэн Цагаан сарыг тэмдэглэхгүй байх асуудлыг шийдэх нь зөв болов уу ” гэжээ.
