Нийтийн тээвэр энэ сарын 17-ны өдрийг хүртэл тусгай зохицуулалтаар үйлчилнэ


Улсын онцгой комисс өнөөдөр өглөө яаралтай хуралдаж шийдвэр гаргасны дараа үргэлжлүүлэн нийслэлийн Онцгой комисс хуралдаж, шинэ төрлийн халдвараас урьдчилан сэргийлэх хүрээнд авч хэрэгжүүлэх гэж буй ажлуудыг эрчимжүүлэх талаар ярилцлаа. Энэ сарын 2-ны өдөр Москва-Улаанбаатар чиглэлийн онгоцоор ирсэн Франц улсын иргэнээс коронавирусийн сэжигтэй тохиолдол илэрч, Монгол Улсад коронавирусийн анхны тохиолдол бүртгэгдлээ. Түүнээс гадна, энэ хүнтэй хөдөө орон нутагт хавьталд байсан 80 гаруй хүн, Улаанбаатар хотод эхлээд уулзсан 40 гаруй хүний нэр, хаяг, утсыг олж тогтоожээ. Улсын онцгой комиссын шийдвэрээр хот хоорондын хөдөлгөөнийг энэ сарын 16-ны 07.00 цаг хүртэл хориглолоо.

Нийслэлийн Онцгой комиссын хуралдаанаар сэжигтэй тохиолдлоор бүртгэгдсэн иргэний зорчсон, байрласан газруудыг нарийвчлан тогтоож, хавьталд орсон иргэдийг илрүүлэн эрүүл мэндийн тандалт судалгаа шинжилгээнд хамруулахыг хотын Захирагч С.Амарсайхан нийслэлийн Цагдаагийн удирдах газар болон нийслэлийн Эрүүл мэндийн газарт үүрэг болголоо. Мөн энэ сарын 17-ны өдрийг хүртэл нийтийн тээврийн үйлчилгээнд гарах автобусны тоог 50 хувиар бууруулах чиглэлийг нийслэлийн Нийтийн тээврийн газрын удирдлагуудад өглөө. Шаардлагатай тохиолдолд нийслэлийн нутаг дэвсгэрт үйл ажиллагаа явуулж өргөн хэрэглээний зах, худалдааны төвүүдийн ажлын цагийг хязгаарлах арга хэмжээг авч ажиллахыг холбогдох албаныханд үүрэг болгов. Энэ үеэр нийслэлийн Онцгой комиссын зарим гишүүдээс халдвараас урьдчилан сэргийлэхийн тулд олон хүнийг хамарсан хурал зөвлөгөөнийг онлайн хэлбэрээр хийж, түргэн хоол болон хүргэлтийн үйлчилгээ эрхэлдэг иргэн, аж ахуйн нэгжийн үйл ажиллагааг түр зогсоох арга хэмжээг авахыг санал гаргалаа.

Нийслэлийн Засаг дарга бөгөөд Улаанбаатар хотын Захирагч С.Амарсайхан “Халдвараас урьдчилан сэргийлэхийн ариутгал халдваргүйжүүлэлтийг эрчимжүүлж, шалган нэвтрүүлэх товчоодоор яаралтай тусламж авах, зайлшгүй албан ажлаар нэвтрэх иргэдээс нэг бүрчлэн асуумж авч биеийн халууныг нь хэмжиж нэвтрүүлэх ажлыг эрчимжүүлэх хэрэгтэй. Өндөржүүлсэн бэлэн байдалд ажиллаж байгаа албан хаагчдын эрүүл ахуй байдал, хамгаалах хэрэгслээр хангаж ажиллахыг холбогдох албаныхан анхаараарай” гэдгийг онцолж хэллээ. Түүнчлэн иргэдийг олон нийтийн газраар зорчихгүй байж, хувийн ариун цэврийг сайтар хангахыг уриаллаа.

Нийслэлийн ЗДТГ-ын Хэвлэл мэдээлэлтэй харилцах хэлтэс


Энэ мэдээ таалагдаж байвал:


  • иргэн · [203.91.119.42] · 2020/03/13

    Онцгой байдлын алба Онцгой комиссоо ялгах хэрэгтэй Цагдаа Эмнэлэг Онцгой байдлын алба хаагчдийн ажилласан ажиллаж байгаа хүн хүч тээврийн хэрэгсэлийг харицуулж гаргаж иргэдэд мэдээлэл өгөөч Энхтүвшин сайдаа арай тэнцвэргүй байна зарим нь үнэн туйлдаж байна шүү


  • хэл · [203.91.119.42] · 2020/03/13

    онцгой нөхцөл үүслээ ажиллаж байна эмнэлэг цагдаад даалгалаа гэх юм тэр онцгой байдлын байгууллага нь хаачсан юм бэ энэ тэнд пост шалгалт гэхээр хүн байхгүй машин байхгүй гэх юм тэгсэн хэрнээ хамгийн их хөрөнгө мөнгийг бас хандив авах юм ойлгохгүй байна шүү, ёстой тэр онцгойнхон гэж дуулаад байдаг нөхдүүд ажиллах юм биш үү тэр Улаанбадрахад цагдаа л сахиж байна хэдэн арваараа энэ замын постуудад цагдаа л 2-3 аараа ажиллаж онцгойгоос нэг хүн гуйлган байж гарч байна шүү дээ өөрсдөө яваад харж байгаа байх цагдаа эмнэлэг хийхийг нь хийж Онцгой байдлынхан янцаглахыг нь янцаглаж байна хараарай ямар хүнээ гаргаж ямар унаагаа пост юманд гаргаж байгаа юм тийм байж хамгийн их хоолийг идэж хамгийн их зардалыг авч хамгийн их унтаж байна шүү шалгаж үзээрэй


  • зочин · [202.9.40.91] · 2020/03/10

    онц байдал тогтоох, хорио тогтоох зэрэгт хүнсний бүтээгдэхүүний үнэ нэмэхийг хориглон, энэхүү хүнд байдлыг далимдуулан үнэ нэмсэн хувийн худалдаа, ААН-д өндөр торгууль тавих хууль, журам гаргахгүй бол энэ ченжүүд, худалдаачид чинь ядарсан ард түмнийг чинь мөлжиж дууслаа.Монгол төргүй юм шиг байдгийг болимоор юм.Төртэй юм бол ард түмний өмнө төрийн хүлээх үндсэн гурван үүргээ биелүүлээч ээ.Төрийн хулгайч нараа!!!!!!!!!!!!!!!


  • Зочин · [192.82.66.172] · 2020/03/10

    кfс г хаагаачээ