Өнөөгийн УИХ-ын ЖДҮ-чин гишүүдийн тод томруун төлөөллийн нэг гэвэл Ховдын О.Батнасан. Одоо тэр тойрогтоо дахин нэр дэвшинэ гэсэн далд хүсэл, ил амбицтай явж байна. Харин нам нь тэгж дахин эрхлүүлэх бодолгүй л байгаа болов уу. Учир нь тэр нэр цэвэр хүн биш, өнгөрсөн дөрвөн жилийг парламентын танхимд зүүрмэглэж зүүдэлж өнгөрөөсөн нэгэн. Ямар сайндаа л УИХ-ын чуулганы хуралдаанаар Эрүүл мэндийн тухай хууль хэлэлцэж байхад “Өвөлжилт хүндэрлээ, малчид биднээс өвс нэхээд хэцүү байна” хэмээн тэс хөндлөн хадуурч байхав дээ.
Хэрэв У.Хүрэлсүх үнэхээр хэлсэндээ хүрч ЖДҮ-д нэр холбогдсон гишүүдээ дэвшүүлэхгүй гэвэл хамгийн түрүүнд жийгдэх хүний нэг нь тэр.
О.Батнасан гэдэг гишүүн ЖДҮ-гийнхээ ачаар олонд “танигдсан” гэвэл огтхон ч хэтрүүлэг болохгүй. Байгаа үгүй нь мэдэгдэхгүй, хууль хэлэлцэх явцад үг хэлж, асуулт асуудаггүй, УИХ-ын “хэлгүй” гишүүнээр түүнийг нэрлэсэн нь нүдээ оносон зүйрлэл байв. Хөөрхий гишүүний хувьд дуугүй суусан нь өөрт нь өлзийтэй байдаг биз. Яахав, олны аясыг дагаад л кнопныхоо эрх дархыг эдлээд дөрвөн жил дүнсийсэн энэ нөхөр бас ч тийм харах царай шигээ ноомой номхон биш гэдэг нь ЖДҮ-гээр илэрсэн юм. Аргагүй л АН, Ардын намын арга эвийг олж улс төрд орж ирсэн хүний чимээгүй чимхэлт цагаа тулхаар түүнээс гардаг юм байна. Үүний нэг нь ЖДҮХС-аас их хэмжээний зээл салгаж чадсан явдал.
УИХ-д сонгогдсон учир холбогдлоо бараг мартчихсан мэт суудаг гишүүн маань төр түшилцэх үүргээ төрөл төрөгсөд, өөрийнхөө бизнесийг өргөтгөх боломж гэж харжээ. Түүний 45 хувийг нь эзэмшдэг “Кондитер-Улаанбаатар” ХХК-ийн дүрмийн сангийн хэмжээ гишүүн болохоос нь өмнө нь 148.5 сая төгрөг байсан бол гишүүн болсны дараах жилүүдэд 401.3 сая төгрөг болж өсчээ. Энэ ч бас анхаарал татахаас аргагүй тоо байгаа биз.
О.Батнасангийн төрсөн дүү О.Ганбаатарын эзэмшдэг “Топкондитер” компани ЖДҮХС-аас 950 сая төгрөгийн зээл авсан нь илчлэгдсэн. Дуугүй хүний... гэдэг шиг тэр сэргэлэнтэх юман дээрээ сэргэлэнтэж чадсаны нэг жишээ нь энэ. Ганбаатарын эзэмшдэг “Топкондитер” компанид зээл олгоход нь УИХ-ын гишүүнийхээ хувиар нөлөөлж чадсан явдал. Энд ах дүү хоёрын компани хоёулаа “кондитер” гэсэн үг орсон, нэр уснаасаа эхлээд ижил төстэй зүйл харагдаж байна.
Тийм болхоор энэ хоёр компани О.Батнасангийн шууд өөрийн хамаарлын ашиг сонирхлын зөрчилтэй гэдэг нь харагдаж байгаа юм.
ЖДҮ-гийн асуудал улс төрийн өндөр түвшинд яригдаж анхаарал татаж эхлэх үеэр Ерөнхий сайд У.Хүрэлсүх ЖДҮ-чин гишүүддээ хандан зээлээ хурдан төлж барагдуулахыг үүрэг болгосон. Үүнтэй зэрэгцээд “Топкондитер” компани 150 төгрөг эргүүлэн төлсөн гэх мэдээлэл гарч байсан ч тэгсхийгээд чимээ алдарсан.
ЖДҮ-д нэр холбогдсон гишүүд түрүүчээсээ хариуцлага хүлээж, албан тушаалаасаа огцорч, УИХ-ын гишүүнээсээ түдгэлзэж, 2020 оны сонгуульд нэр дэвшихээсээ татгалзаж байгаа. Харин мань О.Батнасан хариуцлага хүлээх байтугай л гэм зэмгүй хүний дүр эсгэж энхийн цагаан тагтаа аятай Ховдод нэр дэвших “хол”-ын мөрөөдөлтэй явна.
Хэрэв түүний нэрийг МАН дахин дэвшүүлбэл ЖДҮ-чнээ дэмжсэн явдал болно. Нөгөө талаасаа Ерөнхий сайд хэлсэндээ хүрдэггүй, худлаа ярьсан болж харагдана.
Тэгэхээр мань эрийн Ховдын тойрог зүүд зэрэглээ төдий болох нигуртай гэсэн үг
Шуурхай.мн
