Улаанбаатар /МОНЦАМЭ/. Монголын хөлбөмбөгийн үндэсний шигшээ баг, өчигдөр орой Япон улсын Чиба хотноо 28 мянган хүний суудалтай Фукуда Денши цэнгэлдэх хүрээлэнд тус улсын шигшээ багтай тоглож 0:14-өөр хожигдлоо.
Хөлбөмбөгийн ДАШТ болон Ази тивийн АШТ-ий урьдчилсан шатны энэхүү тоглолтын Монголын Үндэсний шигшээ багийн дасгалжуулагч Растислав Бозикын өгсөн ярилцлагаас толилуулж байна.
Тэрбээр: "Өнөөдөр бид олон гоолын зөрүүтэй хожигдлоо. Мэдээж энэ бүхний гол бурууг би үүрэх ёстой. Тоглогч нар маань эцсийн мөч хүртэл бууж өгсөнгүй. Надад онооны харьцаа яаж дууссан нь сонин биш. Бид дэлхийн шилдэг багийн хаалганд гоол оруулахын төлөө тоглолоо.
Японы шигшээ багийн тоглогчдын хувьд ДАШТ-д өөрийн байр суурийг олж авахын төлөө манай багийн эсрэг бүх хүчээ дайчлан тоглосонд баяртай байна. Бидний хувьд том туршлага болж үлдлээ. Энэ тоглолт Монгол Улсад зохион байгуулагдах байсан бол үр дүн ялгаагүй байх байсан болов уу. Түүхэнд тооны харьцаа хэдээр дууссан нь л үлдэх байх. Гэхдээ тоглолт хэрхэн өрнөснийг хэн ч дурсан ярихгүй" хэмээн онцолжээ.
Д.Өлзийсайхан
Эх сурвалж: "Монцамэ" агентлаг
