ТЕГ-ын дарга асан генерал Б.Хурц нарын 9 хүнд холбогдох хэргийн шүүх хурал Улсын дээд шүүхэд өнөөдөр 09:00 цагт эхэлж, дөнгөж сая шийдвэрээ танилцуулжээ.
Шүүх бүрэлдэхүүн Б.Хурцад 1 жил 6 сар, прокурор Г.Эрдэнэбатад 1 жил, бусад холбогдсон хүмүүст 2 жилийн хорих ял болон торгох ялаар шийтгэсэн талаар мэдээлэл байна.
Ийнхүү эрүү шүүлт болсон хэмээн шүүх үзсэн учраас шинэ илэрсэн нөхцөл байдал гэж үзэж Т.Чимгээ нарын асуудлыг тусад нь хэлэлцэх бололтой.
Улсын дээд шүүхээс Б.Хурцад 1,6 жил, Г.Эрдэнэбатад нэг жилийн хорих ял, бусад холбогдогчид хоёр жилийн хорих ял оноох шийдвэр гаргажээ. Тодруулбал, Төв аймаг дахь Сум дундын Эрүүгийн хэргийн анхан шатны шүүхээс Тагнуулын Ерөнхий газрын /ТЕГ/ дарга асан Б.Хурц, Улсын ерөнхий прокурорын орлогч асан Г.Эрдэнэбат тэргүүтэй есөн хүнд С.Зоригийн амийг хөнөөсөн хэргээр ял авсан Т.Чимгээ Б.Содномдаржаа нарыг эрүүдэн шүүлт тулгасан, гүйцэтгэх ажлын тухай хууль тогтоомж зөрчсөн гэх үндэслэлээр ял оноосон байдаг. Тэгвэл Улсын дээд шүүх өнөөдөр /2021.03.31/ Төв аймгийн Эрүү, Иргэний хэргийн давж заалдах шатны шүүхийн 2020 оны аравдугаар сарын 29-ний өдрийн 158 дугаар магадлалтай, ТЕГ-ын дарга асан Б.Хурц, Улсын Ерөнхий прокурорын орлогч асан Г.Эрдэнэбат нарын есөн хүнд холбогдох 40 хавтас маш нууцын хэргийг шүүгдэгчдийн өмгөөлөгчид хамтран гаргасан гомдол болон прокурорын бичсэн эсэргүүцлийг үндэслэн хэлэлцсэн байна.
Хэргийг эргэн сануулахад, Төв аймаг дахь Эрүүгийн хэргийн давж заалдах шатны шүүх 2020 оны аравдугаар сарын 29-ний өдөр анхан шатны шүүхийн шийдвэрийг бүхэлд нь хүчингүй болгож, хэргийг мөн шүүхээр дахин хэлэлцүүлэхээр буцааж, шүүгдэгч нарт авсан таслан сэргийлэх арга хэмжээг тус, тус хэвээр үлдээж шийдвэрлэсэн юм.
