Гадаад харилцааны яамны нэр дээр бүртгэлтэй, нэг ёсондоо дипломат машинаар баар, буудлын хооронд шөнөжин эргэлдэж, согтуу хүүхэн залуусыг зөөж байгаа бичлэг олон нийтийн сүлжээнд тархаад байна.

Нарийн судалбал, Гадаад харилцааны дэд сайд Б.Мөнхжингийн нэр дээр байдаг гэх. Харин Гадаад харилцааны яамнаас энэ талаар тайлбар хэлэхдээ дэд сайдынхаа нэрийг бодсон уу, өөрөө тайлбарлажээ. Ингэхдээ “ГХЯ-ны  Дипломат байгууллагын бүртгэлтэй машин. Элчин сайдын яамдад үйлчилдэг бизнес үйлчилгээний автомшин.  Дэд сайд машин нь эвдэрсэн үед ганц хоёр удаа дуудаж унаж байсан тохиолдол байж магадгүй” гэжээ.

Тухайн үед дэд сайд Б.Мөнхжин унаж явсан уу эсэхээс үл хамаарч энэ машин бол дипломат машин мөн гэдгийг ГХЯ өөрөө баталжээ. Бүр нарийн яривал Элчин сайдын яамдад үйлчилдэг машин гэж байна.

Үүнээс маш ноцтой асуудал харагдаж байгаа юм. Монгол Улсад суугаа гадаадын Элчин сайдын яамдын үйлчилгээний машин Монголын баар, буудлуудаар хэсч явна гэдэг юу гэсэн үг вэ.

Товчхондоо бол манай Гадаад харилцааны яам, Монголын дипломат алба шившиг болж гүйцлээ. Хоёр жилийн өмнө ХБНГУ-д 70 кг хар тамхи зөөвөрлөж яваад баригдсан Монголын 2 дипломатчийн хэрэг дэлхийд дуулиан тарьсан. Тэд яван явсаар дэлхийн хар тамхины мафитай холбоотой талаар ч хэрэг шалгалтын үед дэлгэгдэж байлаа.

Үүнээс гадна хууль бусаар бараа зөөсөн, архидан согтуурсан, танхайрсан гээд монгол дипломатчуудын хэргийн цуваа тасардаггүй.

Дипломат алба гэдэг Монгол Улсын тусгаар тогтнолын дархлаа. Гадаадад бол Монголын нүүр царай. Тэд өнөөдөр баар, буудлуудаар шөнөжин хэсч хөлчүүрхсэн хүүхэн залуусыг зөөвөрлөж явна. Магадгүй өөрсдөө ч тэдний нэг болоод хөлчүүрхэж явсан биз!!!