Цагдаа хууль сахиулах үүрэгтэй. Ард түмнийхээ аюулгүй байдлын манаанд цаг наргүй ажилладаг цагдаа нарыг хүндэлдэг. Гэхдээ ард иргэдээ хохироодог цагдаа байж болохгүй.

Манайд сүүлийн үед “хэрэг илрүүлэх норм” гэдэг ойлголт ил далдаар яригдах боллоо.

Замын цагдаа л гэхэд торгуулийн нормтой байдаг гэх. Өөрөөр хэлбэл, өдөрт тийм хэмжээний торгуулийг жолооч нарт тавина гэж. Учир нь дээрээс ингэж даалгадаг гэх юм билээ. Үүнийг бараг манайхан мэддэг болсон доо. Замын хөдөлгөөнд оролцож байсан жолоочийг зогсооно. Илт зөрчил гаргасан бол мэдээж торгоно. Зөрчил тогтоогдохгүй бол машины өө сэв зэргээс, эсвэл жолоочийн жижигхэн алдаанаас л торгуулийн хуудас заавал бичиж өгнө.

Замын цагдаа зогсоосон жолоочоо торгуульгүй явуулж байсан удаа тун ховор биз ээ. Энэ бол дээрээс нь торгуулийн норм тавьж өгдөгтэй холбоотой. Нөгөө талаар ингэж нормоо биелүүлбэл байраар шагнана гэсэн уралдааныг цагдаа нарын дунд явуулдаг гэнэ.

Тэгвэл “хэрэг илрүүлэх норм” бусад цагдаа нарт ч бий. Ялангуяа томоохон мөрдөн шалгах хэлтсийн цагдаа нар бүр тодорхой тоогоор хэрэг илрүүлэх үүрэг авдаг талаар Тагнуулын ерөнхий газрын дарга асан Б.Хурц саяхны ярилцлагадаа онцолсон нь анхаарал татлаа. Тэрээр  “Хорих 461 409 дүгээр ангид залуучуудаар дүүрсэн байна. Нэг цагдаа 5 хэрэг илрүүлэх үүрэг өгдөг. Ингэснээр цагдаа нар тоон үзүүлэлт хөөцөлддөг. Эхний 2 хэргээ өөрсдөө илрүүллээ гэхэд дараагийн 3 хэргээ яах вэ гэдэг асуулдал үүснэ. Иймд сүүлийн үед хар тамхиын хэрэг үүсгэх замаар тэр тоогоо нөхдөг болчихож” гэжээ.

Өөрөөр хэлбэл, хар тамхины хэргээр баривчлагдсан хүн хоёр хар тамхи хэрэглэгч олж өгвөл хэргийг нь хөнгөлдөг. Тэгэнгүүт мөрдөн байцаагчийн даалгавраар хоёр найзыгаа дуудаж буудалд оруулаад хувцас хунар руу нь хар тамхи шургуулах маягтай үлдээгээд цагдаад мэдээллэнэ. Ингээд  найзтайгаа хамт хоригдох тохиолдол ч байдаг аж. Мэдээж өөрөө ялаа хөнгөлүүлээд гарсан нь ч олон байдаг гэнэ.

Тоо хөөцөлдөж яваа цагдаа нар иргэдийг эрхийг зөрчих, хилс хэрэгт тулгах тохиолдол үүнээс л бий болох эрсдэлтэй !!!

Эх сурвалж: shuurhai.mn Г.ОЧИР