Эрүүл мэндийн яамнаас халдварын тархалтыг хумихын тулд 28 хоногийн хатуу хөл хориог тогтоох шаардлагатай гэсэн саналыг Засгийн газрын хуралдаанаар өчигдөр /2021.04.07/оруулсан юм. Гэвч Засгийн газар хөл хориог дэмжихгүй гэсэн байр сууриа хэвээр хадгалсан талаар бид мэдээлсэн. Засгийн газар ЭМЯ-нд цар тахлын эсрэг авах хариу арга хэмжээний төлөвлөгөөг боловсронгуй болгоод, дахин шийдлээ танилцуул гэсэн чиглэлиийг өгсөн байна.
Харин өчигдөр /2021.04.08/ орой УОК-ын Шуурхай штабаас мэдээлэл хийх үеэр Шадар сайдын хэвлэлийн төлөөлөгч Ц.Мөнхбаатар "УОК, ЭМЯ-аас 14 хоног хөл хорио тогтоох саналыг Засгийн газарт уламжилсан юм.
Хөл хорио тогтоохгүйгээр халдвар хамгааллын дэглэмийг бариад явах ямар боломжит хувилбарууд бий тухай Засгийн газраас УОК-т чиглэл өгсөн. УОК өнөөдөр хуралдаж тодорхой шийдвэр гарган Засгийн газарт танилцуулан эцэслэн шийдвэрлэнэ." гэв.
Мөн Улсын онцгой комиссын дарга, Шадар сайд С.Амарсайхан өчигдөр үдэш өөрийн цахим хуудсаар дамжуулан дараах мэдэгдлийг хийжээ. Тэрбээр хүний амь нас юунаас илүү үнэ цэнтэй тул хөдөлгөөний хатуу хязгаарлалт хийж, тархалтыг хумих шаардлага үүсч байна гэв.
