Э.Энхбат начинг БНСУ-д эмчлүүлэхээр өчигдөр тус улсыг зорьсон. Харин энэ хэрэгт яллагдагчаар татагдан шалгагдаж байгаа олимпийн аварга Н.Түвшинбаяр эмчилгээний зардал өгсөн, өгөөгүй зэрэг маргаан гараад байгаа.

Энэ асуудлаар Н.Түвшинбаяр аваргын өмгөөлөгч Л.Данзанноровоос авсан тодруулга ярилцлага zindaa.mn  цахим хуудаст нийтлэгдсэнийг хүргэж байна. 

-Э.Энхбат начин өнөөдөр эмчилгээ хийлгэхээр БНСУ-ыг зорьсон гэх мэдээллийг бид хүлээж авлаа. Эмчилгээний зардалд Н.Түвшинбаяр аваргын зүгээс ямар дэмжлэг үзүүлж байгаа вэ? Боломжтой бол та бидний асуултад хариулт өгнө үү?

-Н.Түвшинбаярын ар гэрийн зүгээс эмчилгээтэй холбоотой зардлуудыг гаргаж байгаа. “Хүннү эйр” компанийн нислэгээр өнөөдөр Э.Энхбат начныг БНСУ руу авч явлаа. Тухайн тусгай онгоцны зардлыг 100 хувь төлсөн. Мөн очоод хийлгэх эмчилгээний урьдчилгаа зардлуудыг гаргаж, тухайн эмнэлгийн дансанд байршуулсан. Цаашид ч шаардлагатай эмчилгээний зардлуудыг төлнө.

-Та Н.Түвшинбаяртай сүүлд хэзээ уулзсан бэ. Хэргийн мөрдөн шалгах ажиллагааны талаар мэдээлэл өгөх боломжтой юу?

-Ер нь уулзаж байгаа. Хэргийн мөрдөн шалгах ажиллагаа үргэлжилж байна. Шаардлагатай байцаалт, тайлбарыг өгөөд явж байгаа. Хоригдоод шалгагдаж байна.

Н.Түвшинбаяр болон түүний гэр бүлийнхэн Э.Энхбатын биеийн байдалд маш их сэтгэл зовж байгаа. Н.Түвшинбаяр гэлтгүй Монголын ард түмэн нийтээрээ түүнийг хурдан эдгэрэхийг хүсэж байна. Уулзахад хамгийн түрүүнд л Э.Энхбатын биеийн байдлыг асууж, яаралтай эмчилгээнд тусалж, шийдвэрлэх шаардлагатай бүх зүйлийг хийгээрэй гэж захиж байгаа.