ТЕГ-ын дарга асан Б.Хурц нар Т.Чимгээ нарт эрүүл шүүлт тулгасан гэх үндэслэлээр шүүхээс 1.6 жилийн ял аваад байгаа билээ.
Б.Хурцын эхнэр Ү.Сарнай саяхан төрийн 3 өндөрлөгт захидал бичиж байсан юм. Тэгвэл тэр энэ хэргийн талаар хэвлэлд дэлгэрэнгүй ярилцлага өгчээ. Түүний ярилцлагаас ил татаж сийрүүлбэл,
- Улсын Ерөнхий сайд нь Хууль зүй, дотоод хэргийн сайдтайгаа хамт “Мартын 8”-аар хаалттай хорих ангид очиж, тэр Т.Чимгээ гэдэг эмэгтэйтэй уулзсан. Т.Чимгээ нь сэтгүүлчдийн өмнө ил гарч “Би бол хэлмэгдсэн хүн” гэх мелодрамын гол дүрд тоглосон. Түүний дараахан “Т.Чимгээг тэд ингэж л эрүүдэн шүүж, тамлаж байж” гэдгийг харуулахын тулд гүйцэтгэх ажлын бичлэгээс хэсэгчилж үзүүлсэн. Т.Чимгээгийн ах нь Сүхбаатарын талбайд “Халдашгүй дархан эрхтэй”-ээр өлсгөлөн зарласан. Шүүх хурал болохын өмнөх өдөр ЗГХЭГ-ын дарга Ц.Нямдорж Т.Чимгээгийн ахын майхан руу мөлхөж очоод уулзсан. Яг энэ уулзалтын маргааш манай хүнд хорих ял оноосон. Энэ бүхнийг урьдчилж төлөвлөсөн улс төрийн зохион байгуулалттай сценари гэхээс өөр юу гэх вэ.
- Цүнхтэй хувцас, ном, эм сэлтээ машиныхаа багажинд хийчихсэн байсныг нь би хорих анги руу хамт явах гэж байхдаа мэдсэн. Үнэхээр цочирдсон. Харин манай хүн “Миний хайрт санаа зовох хэрэггүй ээ” гээд ер бусын тайван байсан.
- Хоёр том маань юмны учрыг ойлгох насандаа ирсэн. Харин би бага охиддоо л их санаа зовж байна. Аав нь хорих ял сонсчихоод явахдаа “Удаан хугацаагаар явах болох нь ээ. Миний охид ээжийнхээ үгэнд ороорой. Хичээлээ сайн давтаарай” гэж хэлээд духан дээр нь үнэрлээд гарсан.
- Манай хүний эсрэг улс төр ид өрнөж, “С.Зоригийг хөнөөсөн хэргийг илрүүлэх гэсэн биш гэм зэмгүй хүмүүсийг хэлмэгдүүлчихлээ. Тэдэнд хилс ял тулгаж, эрүүдэн шүүжээ” гэх мэдээллийг Ц.Нямдорж Хууль зүй, дотоод хэргийн сайд байхдаа Төрийн ордонд хийж, өдгөө ял эдэлж буй хүмүүсээс болон ар гэрийнхнээс нь уучлалт гуйж байсан шүү дээ.
- Анхан, давж заалдах, Улсын Дээд шүүх дээр энэ хэргийн гүйцэтгэгчид гэх хүмүүс хэргээ хэрхэн хүлээж, гэрчүүд юу гэж мэдүүлж, прокурорууд ямар нотлох баримтад үндэслэн яллах дүгнэлт үйлдсэнийг Монголын ард түмэн мэдэх эрхтэй.
- “Гэмт хэрэгтэн л гэмт хэргийг нуун дарагдуулж чаддаг” гэдэгчлэн С.Зоригийг хөнөөсөн хэргийн захиалагчийг илрүүлэхэд дургүй байгаа хүмүүс хонгилынхоо шүүгчдэд захиалга өгөөд хилс ял тулгасан нь энэ мөн биз.
- Эсрэгээрээ “Ц.Нямдоржийн Эрүүгийн “хар” хууль” гээчийн балгаар Монгол шоронжсон улс болсон түүх саяхных. Гар утас хулгайлсан хүнд арван жилийн хорих ял оноогоод л, тийм биз дээ. Бас тэр эрүүдэн шүүх сандлыг өч төчнөөнөөр захиалсан “Цаад эзэн”-ээр хүмүүс Ц.Нямдоржийг нэрлэж байсан.
- Дүүрэн хүн. Ойлгож байна уу. Хүнийг хайрласан шиг хайрладаг, хэлсэндээ байж чаддаг, зовж, ядарсан найз нөхдөдөө сэтгэлийг нь дүүртэл тусалдаг, тийм л өгөөмөр хүн. Аав, ээж, ах дүүс, хань ижил, үр хүүхдүүдээ дүүрэн жаргалтай байлгаж чаддаг, жинхэнэ эр хүн.
- Манай хүн ТЕГ-ын дарга байхдаа хэвлэлийн бага хурал хийж “Ц.Нямдорж С.Зоригийг хөнөөсөн хэргийг цагдаагаас дандаа салгасан байдаг. Ямар санаа зорилготойг мэдэхгүй. Дахиад энэ хэрэг рүү орж байна. Аюулгүй байдлын зөвлөмжөөр энэ хэрэг дээр ажиллаж байгаа ажлын хэсгийг тогтвортой ажиллуулах ёстой. Гэтэл өнгөрсөн 19 жилийн хугацаанд арван удаа тараасан. Үүний дөрвийг нь Ц.Нямдорж сайдаар ажиллаж байхдаа тараасан шүү” гэж мэдэгдсэн. Тэр ч байтугай “Ц.Нямдорж ерөөсөө хоёрхон л сэдэвтэй. Нэг нь “Эрдэнэт”, нөгөө нь С.Зоригийг хөнөөсөн хэрэг. Хүү Н.Анхбаяраараа “Эрдэнэт”-д шахаа хийлгэдэг. Хуурай дүү С.Анхбаяраараа дамжуулж, 42 сая ам.долларын бараа материал шахсан” гэх утгатай мэдээлэл хийсэн нь Ц.Нямдоржид зуугдах шалтгаан болсон байх.