Улс төрийн нам гэдэг үнэт зүйл, зарчим, чиг шугамтай. Хамгийн гол нь үзэл баримтлалаараа ялгардаг улс төрийн хүчин. Монголын улс төрийн амьдралд сүүлийн өдрүүдэд өрнөж байгаа үйл явц, тэр дундаа АН-ын үйл ажиллагаа, түүний асуудал маш ихээр маргаан дагуулсан, нөгөө талаар дэмжигч олныхоо итгэлийг алдсан үйл явц болж өрнөж байна.

Хамгийн сүүлд гэхэд өчигдөр болсон үйл явдлууд бий. АН-ын дэд дарга гэгддэг, УИХ-ын гишүүн Ц.Тувааны гарын үсэг бүхий гадаад компанитай хийсэн 50,000 ам.долларын үнэтэй гэрээ олон нийтэд ил болоод байна. Тус гэрээний зорилго, заалт нь ноцтой асуудал дагуулж мэдэхээр болоод явчихлаа. Ирэх Ерөнхийлөгчийн сонгуулиар АНУ-ын лоббигоор мэргэшсэн компанийг ажиллуулах. Ингэхдээ одоогийн Ерөнхийлөгч Х.Баттулгыг дэмжих агуулгаар тус лобби компани ажиллах зорилготой болохыг нийтэд ил болсон гэрээн дээр бичжээ.

Гэрээ ил болсон асуудал дэгдэхтэй зэрэгцэн Ерөнхийлөгч Х.Баттулга өчигдөр Сүхбаатарын талбайд мэдэгдэл хийсэн нь дайран дээр давс гэгчээр гэрээний агуулгыг улам ч батлаад өглөө. Цар тахлын үед хүн ард нь аюулт халдварт өвчинд нэрвэгдэн шаналж буй энэ өдрүүдэд Төрийн тэргүүн улс төрийн мэдэгдэл хийсээр байгаа үйл явдал нь маш муухай харагдуулж байна. Гэсэн хэдий ч үргэлжлүүлэн тэрээр өчигдөр МАН-ын тараах үйл ажиллагааг заавал хийнэ гэсэн утга бүхий цаг гаруйн мэдэгдлийг Төв талбай дээрээс хүн ардад зарлав. Түүгээр зогсохгүй жагсаал цуглаанд уриалсан агуулгыг ч тэрээр дурдсан. Хүнд цаг үед улс төрийн асуудал бүр арав, хорьдугаарт эрэмбэлэгдэх учиртай.

Гэвч Төрийн тэргүүн хүн ийнхүү увайгүй үйлдэл гаргасаар байгаа нь ирэх сонгуульд АНУ-ын мэргэжлийн лобби компаниар дэмжүүлэх төлөвлөгөө нь нурах эрсдэлтэй болсон байж мэдэх агуулга эндээс харагдаж байна!!!

Эх сурвалж: shuurhai.mn Г.ОЧИР