Дорноговь аймгийн Хатанбулаг сум дахь Хилийн цэргийн 0168 дугаар ангид алба хааж байсан Хөвсгөл аймгийн харьяат 25 настай хугацаат цэргийн албан хаагч уржигдар амиа хорлосон байдалтай олджээ.
Тэрээр долоо хоногийн дараа цэргийн албанаас чөлөөлөгдөх байсан байна. ХХЕГ-аас энэ талаар "Дорноговь аймгийн Хатанбулаг сум дахь хилийн дугаар ангид 2020 оны нэгдүгээр ээлжээр Өмнөговь аймгаас татагдан ирсэн байлдагч 2021 оны дөрөвдүгээр сарын 24-ний өдрийн 22:00 цагийн орчимд амиа егүүтгэсэн харамсалтай хэрэг гарчээ. Тодруулбал, тус байлдагч нь цэргээс халагдахад долоо хоног дутуу байсан бөгөөд малын суурьт үүрэг гүйцэтгэж байсан. Байлдагч “малаа эргээд ирье” хэмээн гараад малын хашаанд хоолойгоо боомилсон байдалтай олдсон. Тус хэргийг Дорноговь аймгийн цагдаагийн газраас шалгаж байна" гэсэн юм.
Тэгвэл энэ хэргийн талаар ХЗДХ-ийн сайд Х.Нямбаатар мөн тайлбар хийв. Тэрээр “Хилийн цэргийн 0168 дугаар ангид ийм асуудал гарсан байна. Энэ асуудал дээр ажлын хэсэг гаргаад ажиллаж байна. Цагдаагийн байгууллага эрүүгийн хэрэг үүсгээд шалгаж байна. Уг байлдагч долоо хоногийн дараа гэртээ харих байсан. 25 настай, Хөвсгөл аймгийн харьяат, ганц бие хүн байсан.
Өмнө нь болсон үйл явдлуудтай холбоотойгоор Хууль зүй, дотоод хэргийн яамнаас Хил хамгаалах ерөнхий газарт албан бичгүүд хүргүүлсэн.
Алба хаагчдын сэтгэлзүйтэй ажиллах хүчийг нэмэгдүүл, анги нэгтгэлүүд дээр сэтгэл зүйч ажиллуулах чиглэл өгсөн. Долоо хоногийн өмнө Хил хамгаалах ерөнхий газраас өгсөн чиглэлийн дагуу ангийн удирдлагууд цэргийн ангиудад ажиллаж хоол унд, нөхцөл байдлын талаар асууж хариулт авахад ямар нэгэн тодорхой зүйл илэрхийлээгүй гэж байгаа. Говийн хоёр цэргийн анги дээр ийм харамсалтай хэрэг гарсан. Өмнө болсон хэргийг шалгаад ангийн удирдлагуудыг сольсон. Гэтэл ангийн удирдлагуудыг солиод удаагүй байхад дахин ийм хэрэг гарлаа. Бид үүнийг ажлын хэсэг гаргаад ажиллаж байгаа. Ажлын хэсгийн дүгнэлтийг эргэн мэдээлнэ” гэлээ.
Эх сурвалж: shuurhai.mn
