Унгар улс коронавирусийн хүнд давалгаанд өртөж, тэр хэрээр тэнд амьдарч буй монгол хүмүүс халдвар авсаар байгаа юм.

Хамгийн сүүлд 30 орчим настай 7 сартай жирэмсэн монгол эмэгтэй халдвар авч, нас барсан харамсалтай явдал болсон. Унгарын эмч нар талийгч эмэгтэйн хүүхдийгэсэн мэнд гарган авч, эмчилж байгаа талаар тус улсад Элчин сайдаар сууж байсан З.Батбаяр цахим хуудастаа мэдээлж байв.

Тэгвэл дутуу төрсөн монгол нярай эрүүл саруул бойжиж байгаа аж. Энэ тухай Элчин сайд З.Батбаяр "Өнөөдөр Будапешт хотын Хейм Пал хүүхдийн эмнэлэгийн нэгэн салбар эмнэлэгт хэвтэж буй Монгол улсын залуухан иргэнээ эргэлээ. 1050 грамм жинтэй байсан охин маань 2550 грамм жинтэй аварга охин болжээ. Эмнэлэгийн асрагч сувилагч нар иргэнийг маань өхөөрдөөд жигтэйхэн. Ёстой "муухай амьтан" асрагчийнхаа өвөр дээр суниаж харагдсан. Эмчлэгч эмчтэй нь ярилцахад "Хүнд үе өнгөрсөн, одоо хүүхдийн биеийн байдал хэвийн болж, эмнэлгээс гаргасан ч болохоор байгаа" гэж хэлж байлаа.

Амьдралд анхны амьсгалаа авахдаа л хагацал зовлон амсаж, хайртай ээжийгээ алдсан ч сайн эмч нар, сайхан сэтгэлтэй сувилагч асрагч нарын буянаар хүн болж эхлээд буй охин маань удахгүй аавыгаа ирэхээр эмнэлгээс гарч, бидний магнай тэнийх нь дээ.

Охин минь чи Амьдрал бэлэглэсэн ээжийнхээ ачийг хариулж, асар их үнээр олдсон энэ амьдралыг хайрлаж, аавдаа ачлалтай, ард түмэндээ ээлтэй сайн хүн, сайн ээж болоорой. Аав нь удахгүй ирнэ ээ" гэжээ.

Эх сурвалж: shuurhai.mn Г.ОЧИР