Монгол Улсын Ерөнхийлөгч У.Хүрэлсүхийн гаргасан зарлигийн талаар ЕТГ-ын дарга Я.Содбаатар, Байгаль орчин, аялал жуулчлалын сайд Н.Уртнасан нар мэдээлэл хийлээ.
“Тэрбум мод тарих” Ерөнхийлөгчийн зарлигийн талаар Я.Содбаатар танилцууллаа. Тэрбээр "Уур амьсгалын өөрчлөлтийн нөлөөллийг бууруулж, тогтвортой хөгжлийн зорилгыг хангахад Монгол Улсын бодит оролцоог нэмэгдүүлэх, цөлжилттэй тэмцэх үндэсний цогц хөтөлбөр, стратеги гаргаж ажиллах чиглэлийг Засгийн газарт өгч байна. Ирэх оны Улсын төсвийг өргөн барихдаа Засгийн газар Ойн агентлагтай болох асуудлыг төсвийн дагалдах хуулиар оруулж, цөлжилттэй тэмцэн мод тарьж буй иргэн, аж ахуйн нэгжид татвар болон татварын бус бодлогоор дэмжлэг үзүүлнэ. Мод тарих үйл явцыг халамжаас хөдөлмөрт шилжих цогц бодлогын хүрээнд уялдуулан зохицуулна. Үүнээ зэрэгцээ:
- Жил бүр Монгол Улсын дотоодын нийт бүтээгдэхүүний 1 хувиас доошгүй хөрөнгийг уур амьсгалын өөрчлөлт, цөлжилтийн эсрэг үйл ажиллагаанд зарцуулах,
- Улс, орон нутгийн төсвийн хөрөнгө оруулалтын тодорхой хувийг байгальд ээлтэй, стандарт бүхий ногоон байгууламжийг нэмэгдүүлэх эрхзүйн орчныг бүрдүүлэх чиглэлд ажиллах,
- Ойн салбарын бодлого үйл ажиллагааг уялдуулан зохицуулах Төрийн захиргааны байгууллага болох Ойн агентлагийг сэргээн байгуулах чиглэл өгч байна” гэлээ.
Байгаль орчин, аялал жуулчлалын сайд Н.Уртнасан: “Хувийн хэвшлийн компаниуд 10 жилийн хугацаанд 20-120 сая мод тарих санаачилга гаргасан. Тиймээс нэг тэрбум мод тарих үндэсний хөдөлгөөнийг өрнүүлэхдээ Төр, хувийн хэвшил, иргэд ААН-ийн хамтын оролцоо уялдаа холбоог хангаж ажиллана. Монгол Улсын хэмжээнд ойн мэргэжлийн 1078, нөхөн сэргээх ойжуулалтын ажлыг дагнаж хариуцдаг 224 байгууллага бий. Тэрбум мод тарих 10 жилийн хугацаанд 4.3 их наяд төгрөг зарцуулахаар тооцоолж байна” гэв.