ЛОНДОН. /Радио Sputnik/. Сүүлийн хэдэн долоо хоногт Их Британийн дөрвөн компани байгалийн хийн үнэ нэмэгдсэний улмаас дампуурлаа зарлалаа гэж “The Independent” сонинд бичжээ.
Тус сонинд бичиж буйгаар, цементийн үйлдвэр, хөнгөн цагаан үйлдвэрлэгч гэх мэт байгалийн хий ашигладаг бүх аж ахуйн нэгжүүдэд бэрхшээл тулгараад байгаа аж.
АНУ-д байгалийн хийн үнэ сүүлийн нэг жилд хоёр дахин өссөн бол Европ, Азийн орнуудад бөөний үнэ өнгөрсөн оныхоос тав дахин нэмэгджээ.
Их Британид мөн сүүлийн 1.5 сарын хугацаанд эрчим хүчний таван компани хаагдсан бөгөөд дахин дөрвөн компани дампуурлаа зарлаж магадгүй байна.
Тус улсын Эрчим хүчний сайд Кваси Квартенг компаниуд болон Цахилгаан эрчим хүч, хийн зах зээлийн удирдах газартай (Ofgem) 20 орчим уулзалт хийжээ.
АНУ-ын бордоо үйлдвэрлэгч томоохон компани болох “CF Industries” Европын эрчим хүчний хямралын улмаас Их Британид хоёр үйлдвэрээ есдүгээр сарын эхээр хаасан байна.
Үйлдвэрүүд хаагдсаны улмаас тариаланчдын зардал нэмэгдэж, улмаар хүнсний инфляцыг өсгөж магадгүй байна. “Bloomberg” агентлагийн мэдээлснээр, хий, цахилгааны үнэ огцом өссөн нь эдийн засгийн сэргэлтийг удаашруулахын зэрэгцээ бүс нутгийн инфляцыг нэмэгдүүлнэ.
Д.Жаргал
Эх сурвалж: Монцамэ агентлаг