МОНРЕАЛЬ. /Ukrinform/. IATA буюу Олон улсын агаарын тээврийн холбооны ерөнхий ассамблейгаас 2050 он гэхэд нүүрстөрөгчийн ялгарлыг бүрэн зогсоох тухай тогтоол баталжээ.
“Дэлхийн агаарын тээврийн компаниуд байгаль орчинд ээлтэй нислэг үйлдэх маш чухал шийдвэр гаргалаа. Коронавирусний цар тахлын дараа салбарын үйл ажиллагааг сэргээх ажлыг хорт утааг бууруулах замаар хийнэ. Нисэхийн салбарыг нүүрстөрөгчгүй болгох нь жинхэнэ сорилт юм. Гэсэн хэдий ч энэ зорилгод хүрэх найдвартай арга зам байгаа гэдэгт бид бат итгэлтэй байна” гэж IATA -ийн ерөнхий захирал Вилли Уолш онцлон тэмдэглэсэн байна.
Нүүрстөрөгчийн ялгаруулалтыг бууруулах арга хэмжээнүүдийн нэг бол байгаль орчинд ээлтэй түлш ашиглах явдал бөгөөд ийм түлш одоо маш бага хэмжээгээр үйлдвэрлэж байгаа юм. Түүнчлэн шинэ технологи нэвтрүүлэх, салбарын дэд бүтцийн үр ашгийг дээшлүүлэх, цахилгаан болон устөрөгчийн хөдөлгүүрийг ашиглах төлөвтэй байна.
Д.Жаргал
Эх сурвалж: "Монцамэ" агентлаг
