“Эхлэл Электроникс” ХХК-ийн гүйцэтгэх захирал Э.Тэмүүжинтэй ярилцлаа.

-Монголын анхны электрониксийн үйлдвэр тун удахгүй албан ёсны нээлтээ хийх гэж байгаа юм байна. Үйлдвэрийнхээ талаар танилцуулахгүй юу?

-Эхлэл брэнд компани дотроо 9 салбартай. 2019 оны 9 сарын 19-нд чихэвч, USB угсрах тоног төхөөрөмж оруулж ирснээр манай электрониксийн салбарын үйл ажиллагаа эхэлж байлаа. Анх 5 нэр төрлийн бүтээгдэхүүн үйлдвэрлэдэг байсан. Харин одоо үйл ажиллагаа маань өргөжиж шинэ тоног төхөөрөмж нэвтрүүлэн 1200 мкв талбай бүхий үйлдвэртэй болсон. Бүтээгдэхүүний төрөл ч нэмэгдэж 15 нэр төрлийн утасны дагалдах хэрэгслийг эх орондоо үйлдвэрлэж байна. Адаптер, чихэвч, цэнэглэгч кабел үйлдвэрлэдэг тоног төхөөрөмжүүдийг оруулж ирснээр орчин үеийн шинэлэг бүтээгдэхүүн үйлдвэрлэх боломжтой болсон байгаа. Манай компани ODM хэлбэрээр бүтээгдэхүүнээ хөгжүүлж гаргадаг. Монголд үйлдвэрлэх боломжгүй бүтээгдэхүүнийг захиалж хийлгэнэ. Гэхдээ загвар, материал, техникийн шаардлагыг манай мэргэжилтнүүд, инженерүүд гаргана. Apple, Nike гээд дэлхийд алдартай компаниуд миний сая хэлсэн ODM хэлбэрээр бүтээгдэхүүнээ хөгжүүлж гаргадаг. Монголын анхны электрониксийн үйлдвэрийн нээлтийг ирэх 11 сард хийхээр төлөвлөсөн байгаа.

- “Эхлэл Электроникс” компанийн онцлох бүтээгдэхүүнийг нэрлэ гэвэл аль бүтээгдэхүүнээ онцлох вэ?

-Хамгийн анх probazz 21 бэлэгтэй чихэвч гаргаж байсан. Энэ чихэвч нь Монголдоо угсарч үйлдвэрлэсэн анхны бүтээгдэхүүн маань болохоор бидний хувьд маш үнэ цэнтэй. Зах зээл дээр хамгийн эрэлттэй байгаа бүтээгдэхүүн гэвэл Type-C USB кабел цэнэглэгч, Bluetooth чихэвч байна.

- Онлайн худалдааны дэлхийн топ сайтуудын нэг Алибабагаар “Эхлэл” брэндийн бүтээгдэхүүнүүд арилжаалагдаад эхэлсэн байсан. Энэ талаар мэдээлэл өгөөч?

- Манай компанийн алсын хараа бол электрониксийн салбарт Монголыг түүчээлэн дэлхийд брэндээ таниулах юм. Энэ хүрээнд Казахстан, Өвөрмонгол руу бүтээгдэхүүнээ экспортлох ажлыг эхлүүлсэн. Алибабагийн онцгой компанийн эрх гэж байдаг. Энэ эрхийг аваад бүтээгдэхүүнээ Алибабад байршуулсан. Цаашид Амазон, АлиЭкспресс гээд олон улсын худалдааны платформууд дээр бүтээгдэхүүнээ гаргах зорилготой ажиллаж байна. Казахстан, Польш улс руу экспорт хийхээр борлуулагч нартай гэрээ хийх судалгааны ажлыг эхлүүлсэн байгаа.

- Электрониксийн үйлдвэр хэчнээн ажлын байр бий болгож байгаа вэ?

- Одоогоор 50 гаруй хүнийг ажлын байраар хангаад байна. Цаашид үйл ажиллагаа өргөжихөөр энэ тоо өснө. Монголчууддаа хандаж хэлэхэд үндэсний үйлдвэрлэлээ дэмжиж байж улс орон хөгжинө. Ажлын байрыг бий болгож, нэмүү өртөг шингэсэн бүтээгдэхүүнийг бүтээдэг үндэсний үйлдвэрлэгч нараа дэмжиж эх оронч худалдан авалт хийдэг бүх хүмүүс дээ баярлалаа гэж хэлье.

-Ярилцсанд баярлалаа.