Өнөөдрөөс эхлэн соёл урлаг, спортын зарим арга хэмжээг нээж байгаатай холбогдуулан УОК, НОК-оос хамтарсан мэдээлэл хийж байна. Мэдээллийн эхэнд Монгол Улсын Ерөнхий сайд Л.Оюун-Эрдэнэ ард, иргэддээ хандаж үг хэллээ.
Тэрбээр “Жилийн өмнө нөхцөл байдал өөр байсан. Өнгөрсөн хугацаанд 6 удаа хатуу хөл хорио тавьж үүнээс улбаалж Монгол Улсын эдийн засаг түүхэндээ хоёр дахь удаагаа хасах руу орсон. Эдийн засгийн үзүүлэлт -5.3 хувь болж үйлчилгээний салбарууд хаалга барьж, 120 гаруй мянган иргэн ажлын байргүй болсон. Гэхдээ өнөөдөр бол 9 дүгээр сарын 1 шиг тэмдэглэгдэн үлдэх өдөр юм. 11 сарын 1-ний өдрөөс эхлэн соёл, урлагийн үзвэр үйлчилгээг 50 хувийн дүүргэлттэй ажиллах, аж ахуйн нэгжүүдийг үйл ажиллагаагаа хэвийн явуулах боломжийг олгож байна. Учир нь хүн амын 70 орчим хувь нь вакцины нэгдүгээр тунд, 69 хувь нь хоёрдугаар тунд, 420 мянган иргэн гурав дахь тунд хамрагдаад байна. Хоёр жилийн хугацаанд хаалттай байсан Соёл урлагийн салбараа дэмжиж, өдрөөс өдөрт энгийн амьдралын хэв маяг руу шилжих бодлого руу алхъя” гэлээ.
Г.Лхагва