Өнөөдөр 07.00-08.00 цагийн хооронд БЗД-ийн 21 дүгээр хороо, Дарь-Эхийн шинэ буудалд зам тээврийн ноцтой осол гарчээ. Ослын улмаас нэг хүн газар дээрээ амиа алдсан байна. Хэргийн газрын үзлэг одоо хүртэл явагдаж байгаа тул ТЦА-наас ямар нэгэн мэдээлэл өгөх боломжгүй байна гэлээ. 

Тодруулбал, ослын талаар ТЦА-наас тодруулахад "Осол гарсан газарт хэргийн газар үзлэг хийгдээд одоо хүртэл дуусаагүй байна. Урьдчилсан мэдээллээр явган зорчигчийг мөргөж, амь насыг нь хохироосон хэрэг гарсан. Хэргийн газрын үзлэг дуусахаар дэлгэрэнгүй мэдээлэл өгнө" гэв. 

Тэгвэл баттай эх сурвалжийн мэдээлж буйгаар осол гаргасан жолооч нь ЦЕГ-ын дэд дарга бөгөөд Нийслэлийн цагдаагийн газрын дарга Д.Ядамдоржийн жолооч байжээ. 

Хэвлэлээр жолооч нь түүнийг гэрээс нь авахаар явж байсан гэж мэдээлж байгаа ч эх сурвалжийн мэдээлж байгаагаар Д.Ядамдорж нь тухайн үед машиндаа явж байсан гэнэ. Бэлхэд байдаг гэрээсээ авахуулаад өглөөний 08.00 цагийн шуурхайдаа амжихаар явжээ. Улмаар жолоочдоо урсгал сөр гэсэн тушаал өгснөөр жолооч нь урсгал сөрөн явж байгаад ажлаа хийж явсан ТҮК-ийн ажилтныг мөргөж аминд нь хүрсэн гэв. 

Тэрбээр албаны 0162 УНУ  "Соната-8" маркын автомашинтай явж байгаад ийнхүү осол гаргасан байна. 

Эх сурвалж: Б.Анир Zaluu.com