БНСУ-ЫН ЕРӨНХИЙ САЙД ЛИ НАГ ЁНЫ МОНГОЛ УЛСАД ХИЙХ АЛБАН ЁСНЫ АЙЛЧЛАЛ ӨНӨӨДӨР ЭХЭЛНЭ
Бүгд Найрамдах Солонгос Улсын Ерөнхий сайд Ли Наг Ёны Монгол Улсад хийх албан ёсны айлчлал өнөөдөр эхэлнэ. Айлчлал энэ сарын 27-ныг дуустал үргэлжлэх бөгөөд БНСУ-ын Засгийн газрын тэргүүн манай улсад ийнхүү дөрвөн жилийн дараа айлчлах гэж байна. Айлчлалын хүрээнд БНСУ-ын Ерөнхий сайд Ли Наг Ён Монгол Улсын Ерөнхий сайд У.Хүрэлсүхтэй албан ёсны хэлэлцээ хийж, Ерөнхийлөгч Х.Баттулга, УИХ-ын дарга Г.Занданшатар нарт тус тус бараалхах юм. Талууд айлчлалын үеэр Монгол Улс, БНСУ-ын харилцааг улс төр, батлан хамгаалах, худалдаа, хөрөнгө оруулалт, эдийн засаг, зам тээвэр, эрчим хүч, байгаль орчин, соёл, боловсрол зэрэг өргөн хүрээтэй салбарт гүнзгийрүүлэн хөгжүүлэх, иргэдийн солилцоог дэмжих, олон улс, бүс нутгийн харилцан сонирхсон асуудлаар санал солилцоно.
