Өнөөдөр Ерөнхийлөгч асан Ц.Элбэгдорж цаг үеийн асуудлаар сэтгүүлчдэд мэдээлэл хийлээ. Тэрбээр Үндэсний аюулгүй байдлын зөвлөлөөс гаргасан зөвлөмжийн дагуу бүх шатны шүүгч, Авлигатай тэмцэх газрын удирдлага, Улсын ерөнхий прокурор болон орлогчийг нь чөлөөлдөг, огцруулдаг байх хуулийн төслийг УИХ-аар хэлэлцэж эхэлсэнтэй холбогдуулан өөрийн байр сууриа илэрхийлэв.
“2017 оны долдугаар сарын 10-нд олон сэтгүүлчийн өмнө үг хэлээд явж байсан. Одоо дахиад уулзах боломж гарч ирлээ. Манай Үндэсний аюулгүй байдлын зөвлөл Үндэсний аюултай байдлын зөвлөл боллоо. Өнөөдрийн Хууль зүйн сайд гаднаас хүн авчирч эрүүдэн шүүж, тамалж, гар хөлийг нь хугалж байсан. Үүнийхээ төлөө уучлалт гуйх ёстой. Монгол Улс шүүхгүй байснаас Хууль зүйн сайдгүй, Ерөнхийлөгчгүй байсан нь дээр.
Ардчиллын удирдагчийн амь насыг хөнөөсөн хэргийг хуулийн байгууллага олон жил мөрдөж, алуурчдыг нь оллоо гэж шүүхээр шийдвэр гарсан. Ахиц дэвшил хууль, шүүхийн байгууллагад байсан юм шүү гэдгийг хэлэх нь зөв байх хэмээгээд сэтгүүлчдийн асуултад хариулж байна.
2013 оны наймдугаар сарын 2-ны өдөр миний ээж нас барсан. Үүнээс нэг хоногийн өмнө Н.Энхбаярыг уучилсан. Прокурорын байгууллагын ой дээр үг хэлсэн маань Н.Энхбаярыг сулласнаас хойш. Тухайн үед би өнөөдрийн нөхцөл байдлыг хэлж байсан. Хууль, шүүх дээр шударга ёс тогтоох гэж яваа хүмүүсээ хуульчид хамгаалах ёстой шүү гэж хэлж байсан юм.
Намайг гутлаа тослоод очлоо гэж хэлсэн гэдэг. Энэ чинь хууль, шүүхийн байгууллагад үзүүлж буй хүндэтгэл. Дуудсан үед нь очих ёстой. Н.Энхбаярыг 12 удаа дуудсаны дараа хуулийн байгууллага аргагүйн эрхэнд тийм баривчилгаа хийсэн байдаг.
Аливаа хүн амины хэрэг, ялангуяа төр нийгмийн зүтгэлтнийг хөнөөсөн хэргийн алуурчныг олох, алуурчин нь захиалагчийг хэлж өгөх үе шаттай байдаг. Энэ хэрэг бол гурван шаттай юм байна гэж хардаг. 1998 оны хэрэг гэхээр 21 жилийн өмнө. Өнгөрсөн хугацаанд энэ хугацаанд яагаад илрээгүй талаар харах ёстой болж байна гэж харж байсан. Харин өнөөдөр энэ хэрэг Ц.Нямдоржийн дөрөв дэх шат гарч ирж байна. Ц.Нямдоржийн зохиож буй хэрэг. Шүүхээр шийтгэгдсэн алуурчид амьд байгаа учраас учир нь олдох байх гэж бодож байна.
ҮАБЗ-ийн УИХ-д оруулсан хууль батлагдах эсэх нь асуудал биш болчихлоо. Өнөөдөр батлагдахгүй ч дахиад л оруулж ирнэ. Өнөөгийн Ерөнхийлөгч айдас гэдэг зүйлийг улс төрийн зүрхэнд хийж өгч байна. Энд байгаа олон асуудал бол зүгээр л сэдэв. Сонгуулийн өмнөх хавар угаасаа ингэж ширүүсдэг. Хууль зүйн сайдын гаргаж байгаа аашийг надаас асуувал улс төрийн амьдралаа үргэлжлүүлэх арга шүү дээ. ҮАБЗ бол аюултай байдлын зөвлөл болж хувирсан. Хуулиас зугтаж байсан хүн ҮАБЗ-ийн дарга болоод юу хийх юм бэ. Гадаад, дотоод хамсаатнуудынхаа хэргийг алга болгож, 280 сая америк долларын хэргээ бас л алга болгоно. Хамсаатан гэгддэг ЖДҮ-чидээ аваад үлдэнэ.
Б.Хурц гэдэг хүнтэй Ерөнхий сайдаар ажиллаж байхад Тагнуулын Ерөнхий газрын дарга байхад хамтран ажиллаж байсан. Шударга бусын хонгил гэж таван жил үргэлжилж байгаа кино. Өнөөдрийн үйл ажиллагаа бол өмнө нь бэлдэж байсан ажиллагаа шүү дээ. Монголын төрийг авч, ард түмэнд айдас хүйдэс үүсгэнэ л гэсэн төлөвлөгөө.
Ардчиллын төлөө дугардаг хүн маш цөөн болсон. Намайг хэн хараадгийг, хэнээр хараалгадагийг, хэдэн зуун троллын армитайг би мэднэ. Ц.Элбэгдоржийг өөрөөс нь илүү муу хүн байх ёстой, өөрөөс нь илүү хулгайч, өөрөөс нь илүү шударга бус болгох гэсэн ажиллагаа үргэлжилж байна, цаашид ч үргэлжилнэ.
-Өнөөгийн Хууль зүйн сайдын үед гаднаас хүн хулгайлж ирж байсан, хуруу гарыг нь хугалж, амь насанд нь хүрч байсан. Үүнийхээ төлөө уучлал гуйх ёстой, ийм алба хаших ёсгүй юм.
-ҮХЦ-ийн шийдвэрээр УИХ-ын даргаас огцорсон хүн бол өнөөгийн Хууль зүйн сайд. Өнөөдөр ийм албан тушаал хашаад байх зохимжгүй.
-Ерөнхийлөгч болсон хүн өмнө нь бодож байсан, өмнө нь хийж байсан ажлаа л үргэлжлүүлдэг. Цоо шинэ хүн болж хувирдаггүй.
-Хууль шүүхийн байгууллага дэндүү нэр хүндийг нь унагах, байдал руу оруулж байна.
-Монгол Улс шүүхгүй байснаас Хууль зүйн сайдгүй байсан нь дээр. Шүүхгүй байснаас Ерөнхийлөгчгүй болсон нь дээр.
-Одоогийн Ерөнхийлөгч улстөрчдийн зүрхэнд айдас суулгалаа.
