Хог хаягдлын тухай хуулийн шинэчилсэн найруулгыг Улсын Их хурлын 2016 оны 5 дугаар сарын 19-ны өдрийн хуралдаанаар батлагдан  мөрдөж байгаа билээ.

“Монгол Улсын тогтвортой  хөгжлийн үзэл баримтлал-2030”, “Ногоон хөгжлийн бодлого”-ын баримт бичгүүдэд 2030 он гэхэд хог хаягдлыг дахин боловсруулах хэмжээг 40 хувьд хүргэж, байгальд булж устгах хаягдлын хэмжээг 40 хувь бууруулах зорилтыг тавьсан.

Энэ хүрээнд Байгаль орчин, аялал жуулчлалын яамны санаачилгаар “Ногоон байгууламж, хог хаягдлын менежмент” Хангайн бүсийн нэгдсэн зөвлөгөөн Орхон аймагт зохион байгуулагдаж өнөөдөр нээлтээ хийлээ. Тус зөвлөгөөний нээлтэд БОАЖ-ын дэд сайд Ц.Батбаяр, Төрийн нарийн бичгийн дарга Ц.Цэнгэл болон тус яамны Ойн бодлого зохицуулалтын газрын дарга Б.Оюунсанаа, ХБОБНУГ-ын дарга П.Цогтсайхан болон   “Эрдэнэт үйлдвэр” ТӨҮГ-ын удирдлагууд, Булган, Орхон аймгуудын Байгаль орчны газрууд оролцож хамтран зохион байгуулж байна.

2030 он гэхэд хог хаягдлыг дахин боловсруулах хэмжээг 40 хувьд хүргэнэ

Хот суурины ногоон байгууламжийн эрх зүйн орчныг сайжруулахад орон нутгийн санал зөвлөмжийг тусгах, ногоон байгууламжийн өнөөгийн төлөв байдлыг үнэлэхэд мэргэжилтнүүдийн оролцоог бүрдүүлэх болон хог хаягдлын хуулийн хэрэгжилтийг эрчимжүүлэх, хог хаягдлын зохистой менежментийн тогтолцоог бүрдүүлэх зорилгоор  тус зөвлөгөөнийг  орон нутагт бүсчилсэн хэлбэрээр зохион байгуулж байна.

Сүүлийн жилүүдэд хүн амын төвлөрөл өсч, үйлдвэрлэл, үйлчилгээний шинэ салбарууд байгуулагдаж байгаа болон иргэдийн хэрэглээ ихсэж байгаатай холбоотойгоор үүсч буй хог хаягдлын тоо хэмжээ, нэр төрөл жилээс жилд нэмэгдэж байна.

Улсын хэмжээнд 2018 оны байдлаар хог хаягдлын төвлөрсөн 390 цэгт 3,4 сая тонн хог хаягдал цугларсан бол, зориулалтын бус газарт 151 мянган тонн хог хаягдал хаягдан, 22 мянган га талбайг бохирдуулсныг цэвэрлэсэн байна.

Аймаг орон нутаг аюултай хог хаягдлын газраа шийдэх шаардлагатай байна

Аюултай хог хаягдалтай холбоотой үйл ажиллагааг зохицуулах хууль эрхзүйн орчин хангалтгүй, аюултай хог хаягдлыг байгаль орчинд ээлтэй аргаар устгах байгууламж байхгүйгээс ихэнх нь энгийн хог хаягдалтай хамт хогийн цэгт, зарим нь хөрс усанд шууд хаягдаж, үлдсэн нь зориулалтын бус газар хадгалагдаж байна.

Нийт хог хаягдлын 50 орчим хувь нь дахин боловсруулах боломжтой хог хаягдал байгаа боловч цуглуулж, дахин боловсруулж, экспортлож байгаа хог хаягдлын хэмжээ 10%-д ч хүрэхгүй байгаа юм.

Олон улсын түвшинд хог хаягдлын цогц менежментийг бий болгон, хог хаягдлыг дахин боловсруулах, дахин ашиглах, түүнээс эрчим хүч үйлдвэрлэх замаар хог хаягдлыг эдийн засгийн эргэлтэнд оруулж, байгалийн нөөц баялагийг хэмнэх, эцсийн устгах хог хаягдлын хэмжээг бууруулах бодлогыг барьж байна гэдгийг БОАЖ-ын дэд сайд Ц.Батбаяр зөвлөгөөний нээлтийн үеэр хэлсэн үгэндээ онцоллоо.

Түүнчлэн Монгол Улсын Төрөөс ойн талаар баримтлах бодлогод ойгоор бүрхэгдсэн талбайг нутаг дэвсгэрийн 2020 онд 8,3 хувьд, 2030 онд 9,0 хувьд хүргэх зорилт тавьсныг хэрэгжүүлэхэд жилд даруй 125,0 мянган га ойжуулах шаардлагатай. Ойжуулалтын ажлыг доройтсон ойг нөхөн сэргээх, говь, тал хээрийн бүсэд ойн зурвас байгуулах, хот суурин газарт хотын ой байгуулах, ногоон байгууламжийг нэмэгдүүлэхэд ойжуулалтын бодлого чиглэгдэж байна.

Хангайн бүсэд ногоон байгууламжийг нэмэгдүүлэх боломжуудыг агро ойн аж ахуй, ойн зурвас байгуулах ажлуудтай уялдуулан гүйцэтгэх, уул уурхайн нөхөн сэргээлт, төвлөрсөн хогийн цэгийн тусгаарлах зурвас байгуулах, цэцэрлэгжүүлэх ажилтай уялдуулан хэрэгжүүлж байгааг тэрбээр Нутгийн өөрөө удирдах байгууллага болон нутгийн захиргааны байгууллагын төлөөлөгчид, Хувийн хэвшил, үйлдвэрлэгч, импортлогч, дахин боловсруулагчдын төлөөлөл, Иргэний нийгэм, төрийн бус байгууллагын төлөөлөгчид зэрэг зөвлөгөөнд оролцогчдод хандан хэллээ.

 Хоёр өдөр үргэлжлэх тус зөвлөгөөнөөр:

Хот суурины ногоон байгууламжийн эрх зүйн орчныг сайжруулахад орон нутгийн санал зөвлөмжийг тусгах, ногоон байгууламжийн өнөөгийн төлөв байдлыг үнэлэхэд мэргэжилтнүүдийн оролцоог бүрдүүлэх, чадавхийг нэмэгдүүлэх

Хог хаягдлын хуулийн хэрэгжилтийг эрчимжүүлэх, хог хаягдлын зохистой менежментийн тогтолцоог бүрдүүлэх;

Хог хаягдлын менежментийн санхүүжилт болон менежментийг сайжруулахад хувийн хэвшил, орон нутгийн оролцоо гэсэн сэдвээр хэлэлцүүлэг өрнүүлэх, харилцан сайн туршлага солилцох зэрэг арга хэмжээнүүдийг зохион байгуулж тодорхой зөвлөмжүүдийг гаргах юм.