МҮБХ-ны Тэргүүлэгчдийн хурал өнгөрсөн Баасан гарагт болж хоёр асуудал хэлэлцэн шийдвэрлэжээ. Нэгдүгээрт энэ жил Өмнөговь, Налайх, Говьсүмбэр, Хэнтий аймгийн наадамд барилдаж шөвгөрсөн бөхчүүдийн цолыг эрэмбэнд оруулахгүй байх шийдвэрээ цуцалсан байна. Ингэсэнээр эдгээр бөхчүүд шинэ цолтойгоо барилдах боломжтой боллоо.

Хоёрдугаарт Допингын асуудлаар барилдах эрхээ хоёр жилээр хасуулаад байсан Монгол Улсын гарьд Ө.Бат-Орших, Улсын заан Б.Пүрэвсайхан, Улсын начин Э.Даш, Аймгийн арслан Б.Номиндалай, Сумын заан С.Майнбаяр нарын бөхчүүдийн барилдах эрхийг  сэргээх асуудлыг авч хэлэлцжээ. Уг хурлаар Б.Пүрэвсайханаас бусад бөхчүүдийн эрхийг сэргээхээр болсон бөгөөд 2017 онд заал, танхимын барилдааны үеэр авсан шинжилгээгээр сэргээшийн шинжилгээнд бүдэрсэн эдгээр бөхчүүд ийнхүү эргэн иргэн ирж, бөхийн барилдаандаа зодоглох боллоо. Улсын заан Б.Пүрэвсайхан нь тухайн үед Б сорьцоо дахиж шинжлүүлэхээр болсон бөгөөд бусад бөхчүүд нь дахин шинжилгээнд хамрагдаагүй билээ.  Ийм учраас Б.Пүрэвсайханы барилдах эрхийг хоёрдугаар сарын 1-нээс сэргээхээр болсон байна.

Бөх сонирхогчдын барилдааныг нь шимтэн хүлээдэг, заалны барилдаанд тогтмол хүч үздэг бөхчүүдийг эргэн ирж байгаад үзэгч түмэн баяртай байгаа бөгөөд дахин ийм хэрэгт хутгалдаж, Монгол бөхийн нэр хүнд, жудагт ёсыг унагаахгүй байхыг хүсэж байгаа билээ. Бөхчүүд маань ч гэсэн үүнийгээ ухамсарлан Монгол бөхийн босоо цагаан хийморийг бүү гутаагаасай хэмээн хүсье.

Шуурхай.мн