Тулгар төрийн 2228 жил, Их Монгол Улс байгуулагдсаны 813 жил, Үндэсний эрх чөлөө, тусгаар тогтнолоо сэргээн мандуулсны 108 жил, Ардын хувьсгалын 98 жил, Ардчилсан хувьсгалын 30 жилийн ойг тохиолдуулан Монгол Улсын Ерөнхийлөгч Х.Баттулга зарлиг гаргаж, өнөөдөр Төрийн дээд цол, одон медаль гардууллаа. 108 жилийн ойн өдрийг тохиолдуулан олгосон энэхүү шагналын эзэн болсон хоёр эрхэм олны талархалыг маш ихээр хүлээлээ. “Нүдээ олсон шагнал”-ын эзэд бол Хавдар судлалын үндэсний төвийн захирал Ж.Чинбүрэн Монгол Улсын Хүний гавьяат эмч цолоор, П.Н.Шастины Нэрэмжит Улсын Гуравдугаар эмнэлгийн Ерөнхий мэс заслын зөвлөх эмч Ч.Пунцаг Монгол Улсын Ардын эмч цолоор тус тус шагнууллаа.
Шастины нэрэмжит Улсын Гуравдугаар Эмнэлгийн Ерөнхий мэс заслын зөвлөх эмч Чимэдцэеэгийн Пунцаг нь 1966 онд Баянхонгор аймгийн нэгдсэн эмнэлэгт мэс заслын эмчээр ажиллаж эхэлснээсээ хойш хүн ардынхаа эрүүл энхийн манаанд өнөөдрийг хүртэл 50 гаруй жил зогсож байгаа гавьяат эмч хүн юм. Тэрээр эмчилгээний хажуугаар эмнэл зүй, мэс заслын шинэлэг техник арга зүй, инновацыг нэвтрүүлэх, залуу эмч нарыг бэлтгэх ажилд одоо хүртэл хүчин зүтгэж, амжилт гаргасаар явна.
Мөн Монгол Улсын Хүний гавьяат эмч цол хүртсэн Хавдар судлалын Үндэсний төвийн захирал, манай улсын шилдэг залуу эмч Ж.Чинбүрэн Монгол Улсын хавдрын өвчлөл, нас баралтаараа дэлхийд тэргүүлж байгаа энэ хэцүү үед Монгол Улсад нэвтрүүлсэн элэгний болон нойр булчирхайн мэс засал, Монголд эмчлүүлэх боломжгүй өвчний жагсаалтыг бууруулж, хавдрын өвчлөл, шалтгаан нөхцөлтэй тэмцэж байгаа дэлхийд хүлээн зөвшөөрөгдсөн нэгэн билээ.
Шуурхай.мн
