Монголчууд бид дэлхий нийтийн хамтаар угтан ирж буй шинэ онтойгоо золгож байна. Та бүхэндээ шинэ оны халуун мэндийг өргөн дэвшүүлье.
Улиран өнгөрч буй 2019 онд Монгол орны минь өөдлөн дэвжих замд бэрхшээл саад мундахгүй их тохиосон ч та бид багагүй амжилт бүтээлээр шинэ оныг угтлаа. Ерөн оны ардчилсан хувьсгалаар эхлүүлсэн өөрчлөлт шинэчлэлийн 30 жилийн алдаа оноогоо цэгнэн, сүүлийн арав гаруй жил яригдсан Үндсэн хуулийн нэмэлт өөрчлөлтийн асуудлыг амжилттай шийдвэрлэж, төрийнхөө тогтолцоог улам бататган бэхжүүллээ.
Дэлхийн зах зээлийн таатай нөхцөл, түүхий эдийн ханшийн тогтвортой байдал, төр, хувийн хэвшлийн шаргуу хөдөлмөрийн үр дүнд улсын төсөвт 9.7 их наяд төгрөг төвлөрүүлээд байна. Гэвч манай улс ФАТФ-ийн дүгнэснээр Саарал жагсаалтанд хоёр дахь удаагаа орсон нь мөнгө, санхүүгийн болон хууль эрх зүйн эрүүл, хяналт сайтай орчин бүрдүүлэхийг шаардаж байгаа билээ. Монгол банкны олон улсын зөвлөмжийн хүрээнд хийсэн судалгаа тооцооноос үзэхэд 2020 оны 9 дүгээр сар гэхэд энэхүү Саарал жагсаалтаас гарах боломжтой бөгөөд гагцхүү төр засгийн байгууллагуудын хариуцлага, харилцсан уялдаа бүхий ажлын хэмжээ далайцаас шалтгаалах нь зүйн хэрэг.
Баялгийн нөөцөөрөө Эрдэнэтээс долоо дахин том төдийгүй дэлхийд тэргүүлж буй Оюутолгойн ордыг ашиглахтай холбогдсон маргаантай асуудлуудыг нааштайгаар шийдэхийн тулд УИХ-аас тогтоол гарган, гэрээг шинэчлэх боломжийг бүрдүүллээ. Уулын баяжуулах Эрдэнэт үйлдвэр үндэсний 100 хувийн мэдлийнх болсноор тус хамт олон өнгөрч буй онд 37 сая тонн хүдэр олборлож, 32 сая тонн хүдэр боловсруулан түүхэндээ хамгийн өндөр ашигтай ажиллаж, улсын төсөвт нэг их наяд төгрөгийн татвар төлсөн байна.
Халх голын байлдааны 80 жилийн ойг тохиолдуулан ОХУ-ын Ерөнхийлөгч В.Путин манай улсад айлчилж, хоёр орны стратегийн түншлэлийг өргөтгөн Иж бүрэн стратегийн түншийн гэрээ байгууллаа. Түүнчлэн Ерөнхий сайд У.Хүрэлсүх хойд хөршид айлчлахдаа ОХУ-аас БНХАУ руу тавих хийн хоолойг Монголоор дамжуулахаар тохиролцлоо. Мөн Ерөнхийлөгч Х.Баттулга АНУ-д айлчилж, хоёр орны стратегийн түншлэл тогтоолоо.
Нийслэл хотын утааг бууруулахын тулд түүхий нүүрс оруулахыг хориглон, “Таван толгой түлш” компанийн сайжруулсан шахмал түлшээр гэр хорооллын айл өрхүүдийг хангаж, элдэв эрсдэл бэрхшээл тулгарч буй ч зохих ахиц амжилтыг олж байна. Энэ мэтээр үйлдвэрлэл, урлаг, соёл, боловсрол, эрүүл мэндийн болон бусад салбарууд ч дор бүрдээ тодорхой ахиц амжилттай ажилласан байна. Эдийн засгийн суурь үзүүлэлтүүд үндсэндээ сайжирсан он жил байлаа. Энэ ч чанараараа бүтээн байгуулалт эрчимжиж, гацаанд ороод байсан дэд бүтцийн томоохон төслүүд урагш ахиж эхэлжээ.
Улс орны хэмжээнд сайн мэдээ олон ч, элдэв саар зүйлсийг арилгах зорилт, шударга ёсны сорилтууд биднийг угтаж байна.
2020 он бол сонгуулийн жил. Иргэд, сонгогчид УИХ-ын болон орон нутгийн сонгуульд идэвхтэй оролцож, төр засгаа шинээр цогцлоон, бүтээн байгуулалтынхаа нөр их ажилд улам өндөр амжилт гаргахыг хүсэн, “Тэнгэр өршөөж, газар ивээх болтугай” гэсэн Их Эзэн Тэмүүжин-Чингисийг төрүүлж өсгөсөн алдарт Өүлэн эхийн билэгт сайн үгийг та бүхэндээ өргөн барьж ерөөе.
Шуурхай.мн сайтын хамт олон
