Авлигатай тэмцэх газрын дэргэдэх судалгааны байгууллагаас гаргадаг авлигын индексийн судалгаагаар авлига хамгийн өндөр магадлалтай байгууллагын тоонд газрын алба байнга зоолттой жагсаж ирсэн юм. Сүүлийн жилүүдэд нийслэл, дүүргүүдийн газрын албаны дарга нартай холбоотой авлигын хэргүүд шил даран гарсаар байгаа ажээ. Гэвч одоогоор энэхүү чухал албаны хүрээнд засал авч сайжирсан юмгүй, бахь байдгаараа л байна. Төрийн албаны ёс зүйг уландаа гишгин, хариуцлага алдаж, ажлаасаа хөөгдсөн этгээд хүртэл албандаа буцаад орчихсон манаргаж явдаг юм байна. Тухайлбал, Нийслэлийн газрын албаны Захиргааны хэлтсийн ахлах мэргэжилтнээр ажиллаж байсан О.Дагвадорж нь албаны удирдлагуудаас өгсөн үүрэг даалгаврыг удаа дараа хангалтгүй биелүүлж, ажилдаа хайнга хандах, ажил таслах зэрэг нь хэрээс хэтэрч 2018 оны 4 дүгээр сарын 2-ны өдөр төрийн албанаас халагдсан байжээ. Тухайн үед түүнийг халсан тушаалд Нийслэлийн газрын албаны даргаар ажиллаж байсан Э.Болорчулуун нь гарынхаа үсгийг зурж тамга даржээ. Гэтэл мань эрийг 2019 оны 6 сарын 12-ны өдрөөс эхлэн Нийслэлийн газар зохион байгуулалтын албаны даргын үүрэг гүйцэтгэгчээр ажиллаж байсан А.Энхманлай нь тушаал гарган Захиргааны хэлтсийн даргын үүрэг гүйцэтгэгчээр томилсон байлаа. Өөрөөр хэлбэл, тэр үед нэг үүрэг гүйцэтгэгч нь нөгөөдөхөө тийнхүү томилжээ. Одоо тэд тус тусын суудалд дарга мяндаг зүүгээд гэлдэрцгээж байна.
Ганцхан жилийн дараа тийм хариуцлагагүй этгээдийг дахиад төрийн албанд томилохдоо албан тушаал дэвшүүлж, бүр хэлтсийн даргын суудалд залж байхад Төрийн албаны зөвлөлийн мануухайнууд нь юугаа харж суув. Сонсохноо, хариуцлагагүйн туйлыг үзүүлэн балайрч яваад ажлаас халагдсан О.Дагвадоржийг үхэхээс наахнуур дэмжсэн А.Энхманлай нь ядаж Төрийн албаны зөвлөл, салбар зөвлөлийг нь ер тоож үзээгүй ажээ.
Газрын алба тун чухал алба гэдгийг дээр онцолсон нь газар бол улс гүрэн оршин тогтох үндэс болдог учраас тэр. Иймээс энэ алба нь зах зээлийн нөхцөлд газрын бодит үнийг үнэн зөв тогтоож, иргэд олон нийтэд нээлттэй, ил тод ажиллах учиртай. Гэтэл нийтийн тусын тулд бус, ердөө л өөрсдийнхөө төлөө элдэв янзын будлиан хутгагчид энэ албанд дэндүү олширч байна. Тэдний нэг нь яах аргагүй энэ О.Дагвадорж гэгч ажээ. Тэрбээр өдгөө дүүргүүдийн хэмжээнд баахан халаа сэлгээний хор найруулаад бужигнуулж байгаа юм байна. Энэ тухай гомдол тасрахаа болив. Мань хашир өөрөө төрийн албаны шалгалт өгөөгүй, ар өврийн хаалга буюу өнөөх авлига хээл хахуулийн хүчээр хэлтсийн дарга болсоноо бусдаас нуух гээд ч яах билээ. Нөгөөтэйгүүр, хотын захирагч С.Амарсайхан нь энэ мэтийн хариуцлагагүй, ёс зүйгүй нөхдөөсөө одоо салах болоогүй гэж үү.
О.Баяр
Шуурхай.мн
