Нийслэлийн Засаг дарга бөгөөд Улаанбаатар хотын захирагч С.Амарсайхан А/521 тоот “Иргэдийн эрүүл мэндийн талаар авах зарим арга хэмжээний тухай” захирамж гаргаж, нийслэлийн нутаг дэвсгэр дээр стандартын шаардлага хангах хэмжээнд үйл ажиллагаагаа явуулж байгаа амралтын газар, аялал жуулчлалын бааз, саун, буудал, бялдаржуулах төв /фитнесс/, иогийн клуб, цөөн хүнтэй сургалтын төвийн үйл ажиллагааг нээсэн юм.
Харин фитнесс төвүүд ямар чиглэл барьж ажиллах талаар ЭМЯ-наас тодруулахад "Нийслэлийн Захирагчийн албанаас санал ирсэн. ЭМЯ-ны зүгээс фитнесс төвүүдийг нээсэн тохиолдолд тархвар судлалын шаардлагууд тавьж байгаа. Нэгдүгээрт 1,5 метрээс дээш зайнд фитнессийн төхөөрөмжүүдийг байрлуулсан байх, нэг дор 10-аас дээш хүн оруулахгүй байх, амны хаалтаа зүүлгэсэн байх, халууныг хэмжсэн байх, цонхыг цаг тутам 10-15 минут онгойлгох зэрэг шаардлагууд тавина. Мөн ариутгал халдваргүйжүүлэлтийн асуудал маш чухал. Энэ тав, зургаан шаардлагыг биелүүлсэн байх ёстой. Хэрхэн биелүүлж байгаад нь Мэргэжлийн хяналтын байгууллага хяналт тавина" гэв.
