Нисэх, Яармаг орчим нийслэлийн хамгийн үнэ цэнэтэй бүс болж байна. Энэ утгаараа тэнд бүтээн байгуулалт эрчимтэй өрнөж, газрын үнэ ч цойлж тэнгэрийнх болж байгаа гэх. Олны ярих нь бөхчүүд голдуу хүмүүс Яармаг болон Богдхан уулын газрыг онилох болсон гэх юм билээ.
Үнэний ортой байхыг үгүйсгэхгүй. Лавтайяа нийтэд тодорхой байгаагаас энэ хавийн газартай холбоотойгоор гавьяат тамирчин Кёкүшюүзан Д.Батбаярыг шалгаж буй гэх мэдээлэл эртээс яригдаж эхэлсэн. Тэднийг дархан цаазат Богд хан ууланд болон Яармагийн дэнжид их хэмжээний газар авсан ч зориулалтын дагуу ашиглаагүй гэж буруутгаж буй.
Ил яригдаж байгаа нь Кёкүшюүзан Д.Батбаяр болхоос биш Харумафүжи Д.Бямбадорж ч Богдхан ууланд сургууль соёл барина хэмээн ихээхэн хэмжээний газар авсан гэх мэдээлэл байдаг.
Үнэхээр ч тэр дархан цаазат уулын ар хормойг бараадуулан "Шинэ Монгол" эрдмийн хурээлэнтэй хамтран ерөнхий боловсролын сургууль байгуулсан. Энэ сургууль үйл ажиллагаа нь жигдрээд багагүй хугацаа өнгөрч байгаа. Харумафүжигийн тухайн үед ярьж байснаар сургуулийн “Н” үсэг хэлбэртэй энэ барилгаас гадна спорт цогцолбор, сурагчдын дотуур байр, цаашлаад ажилчдын орон сууц гэхчлэн асуудлыг цогцоор нь шийдэх тухайгаа ярьсан байдаг.
Харин тэр газарт одоо үргэлжлүүлээд орон сууцны хороолол баригдаж хаяа хязгаар нь дархан цаазат Богдхан уул руу тэлж байна. Чамгүй өндөр үнэтэй орон сууцны энэ хорооллыг сонирхож сонжиж худалдан авах гэсэн эрэлт багагүй байгаа аж.
Ийнхүү мөнөөх сургууль боловсролд хөрөнгө оруулах анхны зорилго нь сүүлдээ орон сууцны бизнес болж хувирсан нь энэ бололтой. Нэгэнт эзэмшлээр авсан газар дээрээ юугаа барих нь тухайн хүний эрх мэдлийн асуудал байж болно. Гэхдээ хууль журам гэж бий. Учир юу вэ гэвээс Харумафүжигийн эзэмшиж буй тэр газар нь дархан цаазат Богдхан уулын нутаг дэвсгэр бөгөөд газар эзэмших зориулалт нь аялал жуулчлалын зориулалтынх. Гэтэл анхны зорилгоо умартан сургууль барьж даамжруулан орон сууцны хороолол барьж эхэлсэн явдал.
Гэтэл үүнийг одоо болтол шалгаж хянаж байгаа төрийн субъект гэж байхгүй юм шиг байна. Хэрэв хуулийн өмнө бүгд тэгш эрхтэй нь үнэн юм бол зарлигаар дархалсан ууланд тэгж эрх дураараа аашлах эрх хэнд ч байхгүй байлтай.
Гэвч Харумафүжигийн дархан газарт хууль журамгүй мэт аашлахад түшиц тулгуур болж байгаа хүнээр цагдаагийн нэг хурандаагийн нэр дуулдаад байгаа юм. Тэр нь Д.Бямбадоржийн авга ах буюу аавынх нь дүү юм байна.
Ном журмаараа бол Харумафүжи Д.Батбаярын нэгэн адил шалгагдаж байх ёстой хүн. Гэтэл түүнийг авга ах хурандаа нь ийнхүү хаацайлж, хамгаалж байгаа гэдгийг олон хүн хэлж байгаа юм.
Цол дагаж бяр гэдэг шиг хурандаа гэдэг хэн бүхний аваад байдаг цол биш. Ийм цолонд хүрэх хамгийн гол шалгуур нь хариуцлага, шударга тууштай байдал гэдэгт эргэлзэх юм алга. Гэхдээ харамсалтай нь хурандаа цолтнуудтай холбоотой таагүй мэдээлэл байсхийж байгаад л харанга дэлддэг боллоо. Тухайлбал, түрээслэдэг байранд нь мөрийтэй тоглоомын газар ажиллаж байсныг мэдээгүй явсан цагдаагийн хурандаа, сэтгүүлч эмэгтэйд гар хүрсэн бас нэг хурандаагийн тухай мэдэлэл цахим орчныг хэсэгтээ шууруулсан юм даг.
Жинхэнэ үлгэр жишээ үзүүлж байх учиртай хурандаа цолтнууд нийгэмд, тэр дундаа залуу үеийнхэнд ийм таагүй байдлаар дууриал болох нь нийгэмд тэр дундаа залуу үеийнхэнд таагүй дууриал болох нь лавтай.
toim.mn