УОК өнөөдөр өглөө хуралдаж, хөл хориог тавдугаар сарын 31-н хүртэл сунгах шийдвэр гаргасан билээ. Энэ талаар болон бусад шийдвэрийг танилцууллаа.
УОК-ын дарга, Шадар сайд Ө.Энхтүвшин "УОК-ын 20 дахь удаагийн хуралдаан болж, хэд хэдэн асуудлаар ярилцаж, шийдвэр гаргалаа. Нэгдүгээрт, хөл хорионы хугацааг сунгах эсэхийг ярилцсан. Нөхцөл байдал улам амаргүй болж байгааг та бүхэн мэдэж байгаа. Дэлхий даяар коронавирус улам хурдацтай тархаж байна. Халдвар авсан хүний тоо 3 сая давлаа. 200 мянга гаруй хүн нас барчихлаа. ОХУ-д нөхцөл байдал улам хүндэрч эхэллээ. АНУ-д нас барсан хүний тоо 36797 болж, халдвар авагсад нэг саяыг давлаа. Олон орон амаргүй нөхцөл байдлыг туулж байна. Манай улсад халдварын тоо нэмэгдсээр байна. 38 тохиолдол илэрчихлээ. Халдвар авсан хүмүүсээс эхний хоёр удаагийн шинжилгээгээр сөрөг гарчихаад гурав дахь удаагаа шинжлэхэд эерэг гарч байна.
Залуучууд халдвар авах байдал дэлхий дахинд нэмэгдэж байгаа. Хөл хориог дагаж мөрдөхгүй байгаатай холбоотой гэж эмч, мэргэжилтнүүд үзэж байгаа юм билээ. Дөрөвдүгээр сарын 17-ны өдөр коронавирусийн эрсдэлийн үнэлгээг хийсэн. Тэгэхэд Монгол Улс маш өндөр эрсдэлтэй гэж үзсэн. Тиймээс хөл хорионы хугацааг тавдугаар сарын 31 хүртэл сунгахаар боллоо. Гадаад, дотоод нислэгийг хязгаарласан хугацаа давхар сунгагдаж байна. Монгол Улсын иргэдийн Алтанбулаг, Буянт-Ухаа, Замын-Үүд боомтоор л хүлээж авах шийдвэр ч үргэжилнэ.
Мэргэжлийн сургалтын байгууллагуудаас маш их санал ирсэн. Сургалтын төвүүдийг нээж өгөөч гэж. Аль болох цөөн хүнтэйгээр сургалтаа хийж, ЭМЯ, УОК-оос өгч буй бүх заавар зөвлөгөө, хязгаарлалтыг дагаж мөрдөхөө ч илэрхийлсэн. Тиймээс энэ долоо хоногт болох УОК-ын хуралдаанаар хэлэлцэхээр болсон. Түүнээс гадна, БНСУ, Япон гээд улсуудаас иргэдээ татаж авчирна. Европ руу буюу Франкфурт руу нэг нислэг хийнэ. ОХУ-аас иргэдээ татаж авах хэрэгтэй байгаа. Маш олон оюутны хичээл тарсан, дотуур байрнаасаа хөөгдөөд гарчихсан байгаа учраас авч ирнэ.
Гадаадаас ирэх хүмүүсийн тоо байнга нэмэгдэж байна. 9890 хүн одоо эх орондоо ирэх хүсэлтэй байгаа. Бид иргэдээ байнга татаж авч ирж байна. Онгоцоор, бусад хэлбэрээр ч ирж байгаа. Дэлхий дахинд нийтдээ 190 мянган монгол иргэн байгаа. Бид эмчилгээнд орсон, жирэмсэн, өндөр настай хүмүүсээ эхний ээлжинд татаж авах журам гаргасан. Энэ шалгуураа л бид баримтална. Солонгосоос ирэх хүмүүсийн тоо байнга нэмэгдэж байгаа. Бид татаж авчирч байна. Цаашид ч авна.
Элчин сайдын яамны гадаа суулт хийх гэж байна гэсэн. Суулт хийгээд нэмэргүй шүү дээ. Суулт хийлээ гээд онгоцны тоо нэмэгдэх биш. Багийнх нь тоо нэмэгдэхгүй. Тиймээс суулт хийж, Элчин сайдын яамныханд хүндрэл учруулах хэрэггүй. Харин Энэтхэг зэрэг улсууд руу нисэж чадахгүй байна. Эсвэл Австрали, АНУ руу явж чадахгүй шүү дээ. Тиймээс байнгын нислэг хийдэг орнуудад ирвэл бид яаж ийж байгаад авах боломжтой. МИАТ-ээ нисгэнэ, гэхдээ байнгын нислэг хийдэг орнууд руугаа л ниснэ. Өөр орон руу явж чадахгүй, чадна гэж худлаа хэлж чадахгүй. Солонгост суралцаж байгаа оюутнуудаа бид 250-иар явуулаад л байгаа. Харин явчихаад, хоёр, гуравхан хоногийн дараа буцах хэрэгтэй боллоо гэж болохгүй шүү гэдгийг л хэлж байна" хэмээлээ.
