Нийслэлийн нутаг дэвсгэрт хуурайшилтын зэрэг их, түймрийн эрсдэл өндөр, ой хээрийн түймэр гарах байгалийн нөхцөл бүрдсэн хуурайшилт ихтэй өдрүүд тохиож байна. Жил бүрийн гуравдугаар сарын 20-ноос зургадугаар сарын 10, болон есдүгээр сарын 20-ноос арваннэгдүгээр сарын 10-ны өдөр хүртэл хугацааг ой, хээрийн түймэр гарах эрсдэлтэй өдрүүд гэдэг.

Сүүлийн өдрүүдэд иргэдийн хариуцлагагүй, ухамсаргүй үйлдлээс шалтгаалан ой, хээр, шар өвсний түймэр гарсан 17 тохиолдол бүртгэгдлээ. Гамшгаас сэргийлэх зорилгоор Онцгой байдлын албан хаагчид, цагдаа, хөдөлгөөнт эргүүл болон Богд-Хан уулын байгаль хамгаалагчид зэрэг нийт 1200 албан хаагч 224 байршилд өндөржүүлсэн бэлэн байдалд, уртасгасан цагийн хуваарийн дагуу ажиллаж байна.

Тэдний ажилд туслах, дэмжлэг үзүүлэх зорилгоор “Цэнгэг усны нөөц, байгаль хамгаалах төв” УТҮГ, “Гэр хорооллын ариун цэврийн байгууламжийг сайжруулах замаар хөрсний бохирдлыг бууруулах” төсөл, “ENSURE” төсөл, “Аялал жуулчлалын хөгжлийн төв” зэрэг байгууллагууд сайн дураараа нэгдэн хандив цуглуулж гал унтраахад зориулан гар доорх материалаар хийсэн 56 ширхэг багаж, 350 ширхэг цэвэр ус, 150 ширхэг маск, 200 хос ажлын бээлий мөн 85 ширхэг ус зөөх сав, 3 ширхэг 1 тонны ус нөөцлөх сав зэргийг бэлтгэснээ өнөөдөр гардуулан өглөө.

Мөн иргэдийг дор бүрнээ хариуцлагатай байж татсан тамхины ишээ бүрэн унтрааж, шашны аливаа зан үйл хийхдээ ил гал гаргахгүй, арц хүж, зул, лаа зэргийг орхихгүй байх, үнс нурмаа ил задгай асгахгүй байх, хүүхдийг чүдэнз, асаагуур болон бусад гал гарах эд зүйлтэй явуулахгүй байхыг анхааруулж байна. Иргэн та иргэний үүргээ биелүүлж гал гарах нөхцөлийг бүрдүүлэхгүй байхад анхааран, гал гарсан тохиолдолд гал унтраах ажилд гар бие оролцож, дэмжлэг үзүүлж байхыг уриалж байна.

Байгаль орчин, аялал жуулчлалын яам