ЭМЯ-ны мэдээллийн үеэр ХӨСҮТ-ийн захирал Д.Нямхүү:
Өнгөрсөн хоногт нийтдээ 350 сорьцонд шинжилгээ хийлээ. Үүнд Сөүл-Улаанбаатарын тусгай үүргийн онгоцоор ирсэн 281 зорчигч болон ХӨСҮТ-д хяналтад байсан 25, Замын-Үүдэд хяналтад байсан 6, мөн тандалтын журмаар Дорноговь болон нийслэлийн Баянзүрх, Сонгинохайрхан, Налайх дүүргийн эмнэлгүүдэд уушигны өвчний оноштойгоор хэвтэж байгаа иргэдийг хамруулсан.
Эдгээр 281 хүний шинжилгээнээс тусгай үүргийн онгоцоор ирсэн зорчигчоос коронавирусийн халдварын нэг тохиолдол бүртгэгдлээ.
Түүнчлэн Бельги улсаас ирсэн иргэнээс коронавирус илэрлээ гэсэн цуурхал иргэдийг амраасангүй. Ийм худал мэдээлэл цацсан хүнийг олж тогтоох хэрэгтэй. Тухайн иргэнээс коронавирус илрээгүй харин эсрэг биет илэрсэн. Энэ нь халдвар авсан гэсэн үг биш бөгөөд коронавирус тухайн хүний биед ороод гарсныг илтгэж буй хэрэг. Гэхдээ бид энэ хүний ойрын хавьтлын 15 хүнийг олж тогтоогоод шинжилгээ авахад вирус илрээгүй. Тухайн хүн Бельгиэс ирээд ажиглалтад байж байгаад гарсан хүн. Тиймээс коронавирусийн халдвар алдагдсан гэх айдсаасаа салж иргэд тайван байх хэрэгтэй.
Нэг баяртай мэдээ гэвэл Франц иргэн маань өнөөдөр нутаг буцлаа. Би өөрөө гаргаж өглөө. Тэр монголчуудад баярлаж талархсанаа илэрхийлж, хэрэв би Францад байсан бол хувь заяа маань яаж эргэх байсныг хэлж мэдэхгүй гэж Монгол эмч нарт хязгааргүй талархаж байгаагаа илэрхийлсэн гэв