Дэлхий нийтийг түгшээсэн COVID-19 цар тахлаас урьдчилан сэргийлэх зорилгоор Монгол Улсын Засгийн газар, Улсын онцгой комиссын шийдвэрээр Гамшгаас хамгаалах өндөржүүлсэн бэлэн байдлын зэргийг 2020 оны тавдугаар сарын 31-ний өдрийг хүртэл сунгасан. Үүнтэй холбогдуулан Боловсрол, соёл, шинжлэх ухаан, спортын яамны Соёл, урлагийн бодлогын зохицуулалтын газраас 2020 оны дөрөвдүгээр сарын 29-өөс тавдугаар сарын 01-ний хооронд харьяа 16 байгууллагын үйл ажиллагаа, яамнаас өгсөн зөвлөмж, үүрэг даалгаврын биелэлттэй танилцаж, тулгамдаж буй асуудал, үйлчилгээгээ цахим хэлбэрээр иргэдэд хүргэх чиглэлээр санал солилцлоо.
Өнгөрсөн хугацаанд соёл, урлагийн байгууллагууд үүссэн нөхцөл байдалтай уялдуулан төлөвлөгөөнд туссан арга хэмжээний биелэлтийг хангах, хуримтлагдсан асуудлаа шат дараатай шийдвэрлэх, барилга байгууламжид хэсэгчилсэн засвар үйлчилгээ хийх, хамтын ажиллагааны шинэ боломжуудыг эрэлхийлэх, зарим бүтээгдэхүүн үйлчилгээг цахим хэлбэрээр олон нийтэд сурталчлах олон арга хэмжээг авч хэрэгжүүлснээ танилцуулж байна. Тухайлбал, Улсын Драмын Эрдмийн Театрын уран бүтээлчид А.Толстойн “Анна Каренина” жүжгийн бэлтгэлээ бүрэн хангаж, Үндэсний Урлагийн Их Театрын хамт олон 70 жилдээ зориулан 60 шторк, нэвтрүүлэг бэлдэн олон нийтэд хүргэхэд бэлэн болгосон байна.
Монголын үндэсний музей үзмэрийн каталогио англи хэл дээр бэлтгэн хэвлүүлж, зарим өрөө тасалгаандаа өөрийн хөрөнгөөр засвар үйлчилгээ хийсэн бол Байгалийн түүхийн музей шувуу, хөхтөн, чулуулаг, үзүүллэгийн шинэ танхим дэглэснээ үзүүлэв.
Түүнчлэн Богд хааны ордон музей хувийн хэвшлийн хөрөнгө оруулалтыг татаж, тохижилтын ажил, Чойжин ламын сүм музей “Өв эрдэнэ” хөтөлбөрийн хүрээнд гадаах зам талбайн тохижилтын ажлыг эхлүүлсэн бол Монголын театрын музейн хувьд үзмэрийн тайлбарыг QR код бүхий технологиор сурталчлах төслийг эхлүүлжээ.
БСШУСЯ-ны Соёл, урлагийн бодлогын зохицуулалтын газраас цаашид өндөржүүлсэн бэлэн байдлын үед баримтлах ёстой дэглэмийг баримтлах, байгууллагын хэвийн үйл ажиллагааг тасралтгүй явуулах боломжийг бүрдүүлэх, соёлын бүтээгдэхүүн үйлчилгээг олон нийтэд сурталчлах шинэ боломжийг эрэлхийлэх, гамшгаас хамгаалах бэлэн байдлын төлөвлөгөөг шинэчлэх замаар аюулгүй байдлыг хангах чиглэлд заавар зөвлөгөө өгөв. Мөн энэ үед ажилтан, албан хаагчдын ажлын ачаалал буурч байгаатай холбогдуулан тэдний мэргэжил, ур чадварыг хөгжүүлэх талаар санаачилга гаргаж ажиллахыг байгууллагын удирдлагуудад үүрэг болголоо.
