Эрүүл мэндийн яамнаас ээлжит мэдээллээ хийв. ЭМЯ-ны газрын дарга Д.Нарангэрэл "Дэлхийн 215 оронд коронавирусийн халдвар бүртгэгдээд буй. 3.6 сая хүн өвчилж, 251 мянган хүн нас барж, 1.1 сая хүн эдгэрч эмнэлгээс гарсан. Харин 2.1 сая хүн эмнэлэгт хэвтэн эмчлэгдэж байна.
Манай 119 утсанд 116 дуудлага ирсэн. БНСУ-аас нэг иргэн холбогдож, эмнэлзүйн заавар, зөвлөгөө авсан. Мөн иргэдийн зүгээс амны хаалтгүй иргэд маш их явж байгааг анхааруулж өгөөч гэж хүссэн. Тиймээс хэдий дулаан орж байгаа ч иргэд амны хаалтаа зүүж, гараа сайтар угаах хэрэгтэй. "Ковид19"-ээс сэргийлэх хамгийн чухал зүйл бол хувийн ариун цэвэр. Бүх албан газрууд ойр тойрноо цэвэрлэж, хоггүй орчныг бүрдүүлэх нь чухал.
ЭМЯ-ны газрын дарга Я.Буянжаргал "Өнөөдрийн байдлаар тусгаарлах байранд 1043 иргэн байна. Тусгай үүргийн гурван онгоцоор 821 иргэн ирсэн. Эрсдэлтэй бүлгийн 45 хүнийг ХӨСҮТ-д тусгаарлагдсан. Эмнэлгийн тусламж шаардлагатай 56 иргэнийг Цэргийн төв эмнэлэгт хэвтүүлсэн. Үлдсэн иргэдийг тусгаарлах байруудад нэг, нэгээр нь тусгаарлаад байна. Нийт 135 эмнэлгийн эмч, ажилтнууд тусгаарлагдан үүрэг гүйцэтгэж байна. Гэрээр 930 хүн хяналтад байна. Дулаарч байгаа иргэд өгсөн хаягтаа бус лагер руугаа явах тохиолдол их байна. Гэхдээ үүнийг өрхийн эмчтэйгээ ярилцаад шилжиж байна.
Тавдугаар сарын 6-8-нд Чингэлтэй дүүрэгт хөл хорионы үеийн дадлага сургуулилт болно. Үүнд бэлтгэл ажлаа хангаад ажиллаж байна" гэв.
ХӨСҮТ-ийн дарга Д.Нямхүү "Өчигдрийн байдлаар вирус судлалын таван лабораторид 307 шинжилгээ хийгдсэн байна. Ховдод ХӨСҮТ-ийн дайны лаборатори ажиллаж байгаа. Тусгай үүргийн онгоцоор ирсэн 275 хүн, Дорнод аймагт тандалтын шугамаар хийгдсэн 6 хүнд коронавирус илрээгүй. Дорнод аймгийн Матад суманд үйл ажиллгаа явуулдаг “Петрочайна Дачин тамсаг” компанийн тээвэрлэлтийн туслан гүйцэтгэгч компанийн жолоочийн хоолой нь өвдөөд халуурсан байна. Өөрөө архаг хоолойны өвчтэй хүн байна. Дархан-Уул аймагт тусгаарлагдсан 26 ачаа тээврийн жолоочоос коронавирус илрээгүй. Мөн Франкфуртын онгоцоор ирсэн нэг иргэн иргэнд давтан шинжилгээ хийхэд коронавирус илэрлээ. Ингээд батлагдсан тохиолдол 41 боллоо. Үүнээс 13 эдгэрэн гарч, 28 хүн эмчлүүлж байна. Турк иргэн 33 хоног эмчлүүлээд эдгэрсэн тул өнөөдөр сувилал руу шилжиж байна. ХӨСҮТ-д эмчлүүлж байсан гадаад иргэд ийнхүү бүгд эдгэрэн гарлаа" гэв.
Ингээд сэтгүүлчдийн сонирхсон асуултад хариуллаа.
-Тусгай үүргийн онгоцоор 821 иргэн ирлээ. Хэдэн удаа шинжилгээ авах вэ?
-Эхний шинжилгээг авсан. Хоёр, гурав хийнэ гэсэн тогтсон тоо байхгүй. Нэг шинжилгээгээр батлагдсан тохиолдлуудын ойрын хавьтлуудиас шинжилгээ авсан. Магадгүй нэг хүнээс 4, 5 ч авч магад. Харин тусгаарлалтад байгаа хүмүүсийг ажиглаж байна.
Б.Аз
