АНУ-ын Сан-франциско хотын Ерөнхий Консул асан Э.Галбадрал нь бүрэн эрхийнхээ хүрээнд гадаад харилцааны түүхэнд анх удаа тухайн улсад ажиллаж, амьдарч, сурч байгаа иргэд өөрсдийн төрөлх хэлээрээ “Жолооны Дүрэм”-ийн шалгалтыг хэлмэрчийн оролцоотойгоор өгч болох тухай саналыг Америкийн албаны хүмүүсд тавьж, удаа дараагийн дипломат хэлэлцээрийн үр дүнд энэхүү саналыг албажуулан ажил хэрэг болгож чадсан байдаг юм.
Энэ нь тус улсад янз бүрийн байдлаар оршин суугаа олон зуун мянган Монголчуудыг ихэд баярлуулсан том бодиттой дипломат ажил болсон. Тиймээс иргэд Монгол Улсын Гадаад Харилцааны албаны Facebook хуудсанд энэ талаар сэтгэгдэлээ өнөөдрийн хүртэл үлдээж байгаагаас тодорхой харж болохоор байна. Өөрөөр хэлвэл олон улсын Дипломат түүхэнд “Алтан Үсэг”-ээр бичигдэж үлдэх, бусад улс оронд суугаа Элчин сайдуудад санаа авах гайхалтай, үнэлүүштэй ажил энэ байлаа хэмээн олон улсын харилцааны мэргэжилтэнгүүд, судлаачид, ахмад дипломатч нар мөн онцлон сайшаасаар байна.
FACEBOOK КОМПАНИД АЙЛЧИЛСАН ГАДААДЫН АНХНЫ ДЭЭД ӨНДӨР АЛБАН ТУШААЛТАН
АНУ-ын Калифорни мужийн Менло Парк хотод байрлах Фейсбүүк компанийн төв оффист Монгол Улсын Гадаад Харилцааны сайд Д.Цогтбаатар албаны хүмүүсийн хамт 2018 оны 10 дугаар сарын 06-нд албан ёсоор айлчилсан байдаг. Тус компанийн урилгаар айлчилсан Гадаад улсын анхны өндөр дээд албан тушаалтан нь сайд Д.Цогтбаатар байсан бөгөөд тус албан айлчлалыг Монгол Улсаас АНУ-ын Санфранциско хотод суух Ерөнхий консул асан Э.Галбадрал анх санаачлан дипломат харилцааны хүрээнд тухайн үедээ амжилттай зохион байгуулсан юм.
ГХ-ны сайд Д.Цогтбаатар нь тухайн айлчлалаар Фейсбүүк компанийн Олон нийтийн бодлогын хөтөлбөр хариуцсан Дэд ерөнхийлөгч Викториа Гранд, Ази, Номхон далайн бүсийн Хонг Конг, Тайван, Монгол Улсыг хариуцсан захирал Жорж Чен, бүсийн Хууль эрх зүйн Ерөнхий консул Дамиан Иёо, Улс төр, засгийн газрын асуудал хариуцсан ахлах менежер Шарон Яо зэрэг тус компанийн удирдах албаны хүмүүстэй уулзсан.
Уулзалтаар Монгол Улсыг сурталчлахад цахим медиа, олон нийтийн сүлжээг түлхүү, үр өгөөжтэй ашиглах, мэдээллийн үнэн бодит байдал болон аюулгүй байдлыг хангахад анхаарч байгаагаа дурдаад цаашид тус компанитай хамтран Монгол Улсын брэндинг хөгжүүлэх, хэрэглэгчдэд өгөөжтэй төсөл хөтөлбөрүүд хэрэгжүүлэх, хамгийн анхны e-chembassy буюу цахим элчин сайдын яам, худалдааны төлөөлөгчийн газар байгуулах, цахим ертөнцөд илгээн ажиллуулах чиглэлээр хамтран ажиллах сонирхолтойгоо талууд илэрхийлээд Фейсбүүкийг дэлхийн улс гүрнүүдийн хооронд найрсаг харилцааг бэхжүүлэх, энх тайвныг сурталчлах чиглэлд олон зүйл хийх боломжтой талаар санал солилцсон аж.
Мөн Фейсбүүк компанийн Олон нийтийн бодлогын хөтөлбөр хариуцсан Дэд ерөнхийлөгч Викториа Гранд “Дэлхий даяар 80 гаруй сая жижиг дунд бизнесүүд бизнесээ өргөжүүлэхэд Фейсбүүкийг идэвхтэйгээр хэрэглэж байна. Нийтдээ 1,6 тэрбум хүн өөрсдийн бизнестээ үр дүнтэйгээр ашиглаж байгааг дурдаад одоогоор 17 улсын 100,000 эмэгтэйчүүдэд хүрээд байгаа сургалтыг 2019 оноос Монголд хэрэгжүүлэх сонирхолтой байна” хэмээн тухайн үедээ онцлон хэлж байжээ. Түүнчлэн өдгөө энэ уулзалтаар яригдсан нэгэн ажил бол тус компанийн олон улсын өмнө хүлээсэн нийгмийн хариуцлагынхаа хүрээнд зохион байгуулдаг тодорхой сургалтуудад Монголоос жил бүр 40-50 мэдээлэл технологийн болон инженерийн чиглэлийн мэргэжилтэнгүүдийг үнэгүй сургаж байхаар тогтсон бөгөөд өнгөрсөн жилээс энэ нь ажил болон хэрэгжсэн ажээ.
Уулзалтын төгсгөлд Сайд Д.Цогтбаатар, Ерөнхий консул асан Э.Галбадрал нар мөн тус компанийн төв оффист ажиллаж байгаа монгол инженер, мэдээллийн технологийн ажилтнуудтай уулзаж, цаг үеийн асуудлаар санал бодлоо нээлттэй солилцон ярилцсанаар энэхүү айлчлал амжилттай өндөрлөж байжээ.
